काठमाडौं, भदौ ११ । क्रिकेटर सन्दीप लामिछाने एसिया कप क्रिकेट खेल्न सोमबार बिहान पाकिस्तान प्रस्थान गरेका छन् । उनी बिहान ११ः२० मा कतार एयरलाइन्सबाट दोहा हुँदै पाकिस्तान जाने नेपाल क्रिकेट संघ (क्यान)ले जनाएको छ ।
उनले एसिया कपमा सेप्टेम्बर ४ मा नेपाल र भारतबीचको खेल खेल्ने बताइएको छ । खेलपछि उनी नेपाल फर्किने सम्भावना छ । उनीविरुद्धको बलात्कार मुद्दाको अर्को सुनुवाइ सेप्टेम्बर ७ मा तोकिएको छ। लामिछानेले नाबालिग बालिकालाई जबरजस्ती करणी गरेको अभियोग लगाइएको छ ।
नेपालका स्टार क्रिकेटरविरुद्धको मुद्दाको सुनुवाइ आइतबार स्थगित भएको छ, जसले उनलाई पाकिस्तानमा टोलीका साथीहरूसँग सामेल हुन अनुमति दिएको छ। गत वर्ष राष्ट्रिय कप्तानबाट निलम्बनमा परेका लामिछाने पक्राउ परे पनि जनवरीमा धरौटीमा रिहा भएपछि सर्वोच्च अदालतले उनलाई खेल्नबाट लगाइएको प्रतिबन्ध फुकुवा गरेको थियो ।
नेपाली क्रिकेट टोली यसअघि पाकिस्तान पुगिसकेको छ ।
Published Date: 28 August 2023
