सिन्धुपाल्चोक, भदौ १० । मेलम्ची नदीमा आएको बाढीले सोचेभन्दा बढी क्षति भएपछि हेलम्बु गाउँपालिकाले प्रदेश सरकारसँग सहयोगको याचना गरेको छ । गाउँपालिकाका अध्यक्ष निमा गलजेन शेर्पाले बाढी र पहिरोका कारण भएको क्षतिबारे रिपब्लिकलाई जानकारी दिँदै वाग्मती प्रदेश सरकारअन्तर्गतको आर्थिक मामिला तथा योजना मन्त्रालयलाई सहयोगका लागि अनुरोध गरेका हुन्।
अध्यक्ष शेर्पाले मेलम्ची नगरपालिका, हेलम्बु, पाँचपोखरी थाङ्पाल गाउँपालिकालगायत विपद्को उच्च जोखिममा रहेका क्षेत्रमा तत्काल रकम उपलब्ध नगरेकोमा असन्तुष्टि व्यक्त गरे ।
यसैबीच स्वास्थ्य तथा जनसङ्ख्यामन्त्री मोहनबहादुर बस्नेतले शनिबार सिन्धुपाल्चोकका हेलम्बु र मेलम्चीलगायतका बाढी प्रभावित क्षेत्रको निरीक्षण गरेका छन् । मन्त्री बस्नेत सिन्धुपाल्चोक क्षेत्र नम्बर २ बाट निर्वाचित सांसद हुन् ।
सो अवसरमा मन्त्री बस्नेतले बाढी प्रभावित क्षेत्रमा तत्काल राहत कार्यक्रम सञ्चालन गर्न जिल्ला प्रशासन कार्यालय र सम्बन्धित निकायलाई निर्देशन दिए । मन्त्री बस्नेतले वाग्मती प्रदेशका सांसद कृष्णकुमार तामाङ, नेपाली कांग्रेस सिन्धुपाल्चोक जिल्ला सचिव रमेशराज भण्डारी, मेलम्चीका उपमेयर रामशरण गिरीलगायतका नेताहरुलाई पनि बाढी प्रभावित क्षेत्रका बासिन्दाको राहत र उद्धारमा खटाइएको जानकारी दिए ।
