काठमाडौं, भदौ २ । ट्वीटरले अब प्रयोगकर्तालाई ब्लक गर्न पाउने सुविधा हटाउने भएको छ । हालै नाम परिवर्तन गरेर एक्स राखिएको यो सामाजिक सञ्जालका प्रमुख एलन मस्कले ब्लक फिचरको कुनै अर्थ नभएको बताएका छन् ।
उनले एक्सका प्रयोगकर्ता आफैं सचेत भइसकेका र ब्लकको सट्टा डिरेक्ट म्यासेजमार्फत त्यस्ता प्रयोगकर्तालाई सचेत बनाउन सक्ने बताएका छन् । तर कतिपय प्रयोगकर्ताले भने दुव्र्यवहारबाट बच्न यो नै उपयुक्त टुल रहेको बताएका छन् ।
एलन मस्कले गत वर्ष ट्वीटर खरिद गरेपछि यसमा धेरै परिवर्तन गरेका छन्, त्यसैको सिलसिलामा ब्लक फिचर हटाएका हुन् ।
हाल ट्वीटरमा कुनै युजरले अर्को एकाउण्टको पोस्ट हेर्न नचाहेमा, त्यसबाट कमेन्टहरु होस् भन्ने नचाहेमा ब्लक गर्छन् । ब्लक गरिएको एकाउण्टको पोस्ट आफ्नो टाइमलाइनमा देखिँदैन र आफ्नो पोस्ट पनि ब्लक गरिएको व्यक्तिले देख्न सक्दैन । ब्लक गरिएको एकाउण्टबाट डिरेक्ट म्यासेजहरु पनि आदान प्रदान हुन सक्दैन ।
ट्वीटरका पूर्व संस्थापक ज्याक डोर्सीले एलन मस्कको कदमलाई समर्थन गरेको आशय व्यक्त गरेका छन् । उनले त्यस्ता पोस्टलाई म्युट गर्ने विकल्प हुन सक्ने बताएका छन् ।
तर त्यसले मात्र सामाजिक सञ्जालमा हुने हैरानी, दुर्व्यवहार र आक्रमण रोक्न नसकिने कतिपयको मत छ । कुनै एकाउण्टलाई म्युट गरेर आफ्नोमा देख्न नसकिने बनाउन सकिन्छ, तर म्युट गरिएको एकाउण्टबाट पनि टाइमलाइन हेर्न र रिप्लाइ दिन सकिन्छ ।
एक प्रयोगकर्ताले एलन मस्कको निर्णय ठूलो गल्ती भएको टिप्पणी गरेका छन् । ब्लक अप्सन हटाउँदा एप्पल स्टोर र गुगल प्लेस्टोरका कतिपय नीतिको उल्लंघन हुने मतहरु पनि आइरहेका छन् ।
Published Date: 19 August 2023
