काठमाडौं, साउन १६ । नक्कली भुटानी शरणार्थी प्रकरणमा मुछिएका राजनीतिज्ञहरूले जिल्ला अदालतले थुनामा राख्न दिएको आदेश अमान्य भएको भन्दै उच्च अदालत पाटन पुगेका छन् ।
नेपाली कांग्रेसका नेता तथा पूर्वगृहमन्त्री बालकृष्ण खाँण, नेकपा एमालेका सचिव तथा पूर्वउपप्रधानमन्त्री टोपबहादुर रायमाझी र भुटानी शरणार्थी नेता टेकनाथ रिजालले जिल्ला अदालतको आदेश अमान्य भएको भन्दै उच्च अदालत पाटन पुगेका हुन्।
उनीहरुले मुद्दाको विषयवस्तु र प्रमाणलाई पर्याप्त विचार नगरी थुनामा राखिएको भन्दै जेलबाट रिहा गर्न आदेशको माग गरेका छन् । उच्च अदालत पाटनले खाँड र रायमाझीको विस्तृत प्रतिवेदन पेश गर्न आदेश दिएको छ । निवेदन दिएकाहरुको हकमा जिल्ला अदालतले उच्च अदालत पाटनमा विस्तृत प्रतिवेदन बुझाइसकेको छ ।
जिल्ला अदालतको आदेशविरुद्ध रिट निवेदन परेपछि उच्च अदालतले सम्बन्धित जिल्ला अदालतलाई ‘विस्तृत प्रतिवेदन’ पठाउन आदेश दिएको छ । सम्बन्धित व्यक्तिमाथि लागेको आरोपको आधारमा तयार गरिएको विस्तृत विवरण र त्यसको आधारमा गरिएको आदेशलाई विस्तृत प्रतिवेदन भनिन्छ। विस्तृत प्रतिवेदन प्राप्त भएपछि उच्च अदालतले सुनुवाइसँगै जिल्ला अदालतको आदेशलाई पुनरावलोकन गरी थप आदेश दिने घोषणा गरेको छ ।