काठमाडौं, साउन १६ । कान्तिपुर फिल्म एकेडेमीले निर्माण गरेको सीरीज ‘मिस स्कार्लेट’ को टीजर सार्वजनिक भएको छ ।
साइकोलोजिकल थ्रिलर जनराको यो सीरीजको पहिलो सीजन ४ एपिसोडको हुनेछ र प्रत्येक एपिसोड ४५ मिनेटको हुनेछ । यसलाई नेपाली, हिन्दी र अंग्रेजी भाषामा तयार गरिएको छ ।
वीरगन्जमा छायांकन गरिएको यो सीरीजका लेखक तथा निर्देशक बलिराम चौहान हुन् । सीरीजमा गीत विष्ट, कुल श्रेष्ठ, कमल ओझा, आलिसा बास्तोला, कपिल रसाइली, सबी थापा, सुमित्रा अधिकारी, दिलिप नेपालको अभिनय छ ।
प्रकाश पुरी क्रिएटिभ प्रोड्युसर रहेको यो सीरीजमा शेरबहादुर तामाङको छायांकन छ । यसै सीरीजबाट गीत, कुल र कमलले डेब्यू गरेका हुन् ।
नेपालका लागि तयार पारिएको यो सीरीज ओटीटी प्लेटफर्म कान्तिपुर सिनेमाजबाट भदौ महिनामा रिलीज गरिने छ । अन्तर्राष्ट्रिय ओटीटी प्लेटफर्ममा पनि हिन्दी र अंग्रेजी भाषामा रिलिज हुनेछ ।
यो सीरीजको ट्रेलर ओटीटी प्लाटफर्म कान्तिपुर सिनेमाजको घोषणा कार्यक्रममा सार्वजनिक गर्ने निर्माण पक्षले जनाएको छ । विश्व भरिबाट जुनसुकै डिभाईसमा पनि अनलाईन सब्सक्रिप्सन लिएर हेर्न मिल्ने बताईएको छ ।
प्रारम्भिक चरणमा न्यूनतम ४८ घण्टाको प्रिमीयम कन्टेन्टबाट प्लेटफर्म सार्वजनिक गरिने तथा सबै तयारी पश्चात केही दिनमै प्लेटफर्मको औपचारिक रुपमा घोषणा गर्ने कान्तिपुर सिनेमाजको योजना छ ।
