काठमाडौं, वैशाख २५ । सर्वोच्च अदालतले राष्ट्रिय स्वतन्त्र पार्टी (रास्वपा)का सांसद ढाककुमार श्रेष्ठलाई पदबाट बर्खास्त गर्ने निर्णय कार्यान्वयन नगर्न आदेश दिएको छ ।
सोमबार अन्तरिम आदेश जारी गर्दै सर्वोच्चले ‘कारण देखाउ’ सूचना जारी गर्दै दुवै पक्षलाई छलफलका लागि बोलाएको हो ।
सर्वोच्चका न्यायाधीश तिलप्रसाद श्रेष्ठको एकल इजलासले अल्पकालीन अन्तरिम आदेश जारी गरेको हो । दुवै पक्षका वकिलको बहस सकिएर अदालतले मुद्दाको अन्तिम फैसला नआएसम्म सांसद श्रेष्ठलाई पदबाट हटाउने निर्णय कार्यान्वयन नगर्न रास्वपालाई आदेश दिएको सर्वोच्च प्रशासनले जनाएको छ ।
यसअघि चिकित्सा व्यवसायी दुर्गा प्रसाईसँग दुई करोड माग गरेको अडियो टेप सार्वजनिक भएपछि राप्रपाले श्रेष्ठलाई सांसद पदबाट बर्खास्त गरेको थियो ।
अडियो टेपमा श्रेष्ठले आफू स्वास्थ्यमन्त्री बन्न लागेको र त्यसका लागि पार्टीलाई पैसा तिर्नु पर्ने भन्दै प्रसाईसँग पैसा मागेको स्पष्ट सुनिएको छ ।
पार्टीको निर्णयको विरोध गर्दै सांसद श्रेष्ठले आफूलाई पार्टीको सांसद मात्र नभई सामान्य सदस्यबाट पनि बर्खास्त गर्ने रास्वपाको निर्णय रोक्न माग गर्दै सर्वोच्चमा रिट दायर गरेका थिए ।