मनाङ, वैशाख १३ । यार्सा टिप्ने सिजन सुरु भएसँगै मनाङका बासिन्दा यार्सागुम्बा सङ्कलन गर्न उच्च हिमाली क्षेत्रमा पुगेका छन् ।
सामान्यतया यार्सा टिप्ने सिजन जेठदेखि सुरु भई असारको तेस्रो सातासम्म चल्ने गर्छ ।
माथिल्लो मनाङको नामके खर्क, खाङ्सारखर्क र नारफुखर्कमा बहुमूल्य जडीबुटी संकलन गर्न स्थानीयवासी निस्किएका छन् । उनीहरुको मुख्य आम्दानीको स्रोत कृषि र जडीबुटी हो । चामे गाउँपालिका–४ का जगबहादुर गुरुङले भने, ‘यो सिजन उपयुक्त भएकाले यार्सा संकलन गर्न उच्च हिमाली क्षेत्रमा जाँदैछौँ ।
उनीहरुले अन्नपूर्ण संरक्षण क्षेत्र आयोजना (एसीएएपी) इकाई कार्यालय मनाङबाट यार्सा पिकिङको अनुमति लिएका हुन् । जडिबुटी सङ्कलनलाई मनाङवासीको आम्दानीको प्रमुख स्रोत मानिन्छ । यार्सा संकलनका लागि जिल्ला बाहिरबाट पनि यहाँ आउने गर्दछन् ।
मनाङका प्रमुख जिल्ला अधिकारी सुप्रभा खनाल ढुङ्गेलले यार्सा सङ्कलकको सुरक्षाका लागि आवश्यक व्यवस्था मिलाइएको बताइन् ।नाम्केबाट सङ्कलन शुरु भएको र स्थानीय प्रशासनले माथिल्लो मनाङको नार्फु र खाङ्सारमा पनि सङ्कलन गर्न अनुमति दिएको छ ।
जिल्ला बाहिरका यार्सा र अन्य जडिबुटी सङ्कलन गर्ने र सप्लायरका लागि कोभिड–१९ खोप कार्ड अनिवार्य रूपमा राख्नु पर्ने भएको छ ।
