गोरखा, वैशाख १२ । गोरखाको बारपाक सुलिकोट गाउँपालिकाले आज सार्वजनिक बिदा दिएको छ ।
२०७२ सालमा गएको गोरखा भूकम्पमा परी ज्यान गुमाएकाहरुको सम्झनामा सार्वजनिक बिदा दिइएको गाउँपालिकाका अध्यक्ष विष्णुप्रसाद भट्टले जानकारी दिए ।
२०७२ साल वैशाख १२ गते बारपाक सुलिकोट गाउँपालिकाको बारपाक– वडा नम्बर १ र २ मा केन्द्रबिन्दु भएर गोरखा भूकम्प गएको थियो । ७.८ रेक्टर स्केलको भूकम्पले देशलाई तहसनहस बनायो, ९ हजारभन्दा बढीको ज्यान गएको थियो भने २२ हजारभन्दा बढी घाइते भएका थिए ।
अध्यक्ष भट्टले सार्वजनिक बिदाको समयमा सबै सरकारी कार्यालय, स्वास्थ्य संस्था, विद्यालय, सार्वजनिक संस्था बन्द रहने जानकारी दिए ।
यस अवसरमा आज बारपाकमा विशेष कार्यक्रमको आयोजना पनि गरिएको छ । कार्यक्रममा उपप्रधान तथा गृहमन्त्री नारायणकाजी श्रेष्ठ सहभागी हुने कार्यक्रम रहेको अध्यक्ष भट्टले जानकारी दिए ।
