काठमाडौं, वैशाख १२ । उपनिर्वाचनमा तनहुँ–१ मा राष्ट्रिय स्वतन्त्र पार्टी का उम्मेदवार डा स्वर्णिम वाग्ले भारी मतान्तरले विजयी भएका छन् ।
हालै नेपाली कांग्रेस परित्याग गरी राष्ट्रिय स्वतन्त्र पार्टी बाट प्रतिनिधिसभाको उम्मेदवार बनेका वाग्लेले नेपाली कांग्रेसका उम्मेदवार गोविन्द भट्टराईलाई १४ हजार ३८८ मतले पराजित गरेका थिए ।
वाग्लेले ३४ हजार ४८० मत पाएका छन् भने निकटतम प्रतिद्वन्द्वी भट्टराईले २० हजार ९२ मत पाएका छन् । तेस्रो स्थानमा रहेका नेकपा एमालेका सर्वेन्द्र खनालले आठ हजार ५५५ मत प्राप्त गरे ।
तनहुँ–१ मा एक लाख २३ हजार ३०५ मतदाता छन् । आइतबार भएको उपनिर्वाचनमा ६५ हजारभन्दा बढी मत खसेको थियो । वाग्लेले उपनिर्वाचनमा कुल वैध मतको ५२ प्रतिशतभन्दा बढी मत प्राप्त गरेका थिए ।
दोस्रो स्थानमा रहेका नेपाली कांग्रेसका उम्मेदवार भट्टराईले ३० प्रतिशत मत ल्याएका छन् भने खनालले १३ प्रतिशत मत पाएका छन् ।
