काठमाडौं, वैशाख ८ । देशभरका ६ हजार ७४३ स्थानीय तहका वडामध्ये १ सय ५९ वडाले अहिलेसम्म अत्यावश्यक तथ्यांक अनलाइनमा दर्ता नगरेको राष्ट्रिय परिचयपत्र तथा पञ्जीकरण विभागले जनाएको छ ।
युनिसेफ र महिला, कानून तथा विकास मञ्चले नागरिक दर्ता सप्ताहको अवसरमा बिहीबार यहाँ आयोजना गरेको कार्यक्रममा उक्त जानकारी दिइएको हो । इन्टरनेटको समस्याका कारण १५९ स्थानीय तहका वडाले अनलाइन दर्ता गर्न नसकेको बताइएको छ । ६ हजार ५ सय ८४ वडाले अनलाइनबाटै नागरिक दर्ता गराउँदै आएका छन् ।
विभागका महानिर्देशक रुद्रप्रसाद पण्डितले प्रत्येक वडामा नागरिक दर्ता शिविर सञ्चालन गरेर समस्या समाधान गरिने बताए । उनले पञ्जीकरणमा देखिएका समस्याका बारेमा आवाज उठाउन आग्रह गरे ।
विभागले १५ दिनअघि स्थानीय तहलाई नागरिक दर्ताका लागि परिपत्र जारी गरेको चार दिनमा एकल महिलाका ३ सय ६६ सन्तानको जन्म दर्ता भएको पण्डितले बताए ।
यसका लागि सुझाव प्राप्त भएको चार दिनभित्र परिपत्रको भाषा परिमार्जन गरिएको पनि उनले बताए।