काठमाडौं, चैत्र १९ । हेटौंडाबाट कुलेखानी हुँदै काठमाडौं प्रवेश गर्ने छोटो दुरीका दुईवटा सडक स्तरोन्नतिका लागि बन्द गरिने भएको छ । चितलाङ–चन्द्रागिरि–थानकोट सडक र कुलेखानी–सिस्नेरी–चैमले–दक्षिणकाली सडक पनि स्तरोन्नतिका लागि बन्द छ ।
हाल सडक स्तरोन्नति र मर्मतसम्भारको काम भइरहेकोले अर्को सूचना नभएसम्मका लागि सडक बन्द गरिएको थाहा नगरपालिकाका मेयर विष्णु विष्टले जानकारी दिए । हरेक दिन साँझ ६ बजेदेखि भोलिपल्ट बिहान ६ बजेसम्म सडक बन्द रहने वडा कार्यालयले जनाएको छ ।
त्यसैगरी कुलेखानी–सिस्नेरी–चैमले–दक्षिणकाली सडकखण्डअन्तर्गत इन्द्रसरोवर गाउँपालिका–३ जमिरेदेखि रामचन्द्र भञ्ज्याङ सडक स्तरोन्नति भैरहेकोले सो खण्डमा सडक अवरुद्ध रहनेछ । इन्द्रसरोवर गाउँपालिका–३ को कार्यालयले सडक स्तरोन्नतिको काम गरिरहेको छ ।
हरेक दिन बिहान ७ बजेदेखि बेलुका ५ बजेसम्म एम्बुलेन्स, स्थानीय सवारीसाधन र स्थानीय रुटमा चल्ने सवारीसाधन बाहेक अन्य सवारी साधन नचलाउन अनुरोध गरिएको छ ।
