काठमाडौं, चैत १७ । राष्ट्रिय तथ्याङ्क कार्यालयले २०७८ को राष्ट्रिय जनगणनाको नतिजा सार्वजनिक भएपछि विभिन्न सञ्चारमाध्यम र सामाजिक सञ्जालमा धर्मसम्बन्धी गलत सूचना फैलिएकोमा चिन्ता व्यक्त गरेको छ ।
कार्यालयले बिहीबार एक विज्ञप्ति जारी गर्दै राष्ट्रिय जनगणना, २०७८ को सन्दर्भमा फैलिएको धर्मसम्बन्धी भ्रमपूर्ण, नक्कली र भ्रामक तथ्याङ्कबाट अलमलमा नपर्न सबैमा अनुरोध गरेको छ ।
कार्यालयले जातीय, धर्म र भाषाको विस्तृत तथ्याङ्कलाई अन्तिम रूप दिने र सोही अनुसार सार्वजनिक गर्ने तयारी भइरहेको जनाएको छ । ‘जाति, भाषा र धर्मसँग सम्बन्धित व्यक्ति तथा संघले करिब ७० वटा ज्ञापनपत्र बुझाएकाले सम्बन्धित विज्ञ, संघ, भाषा आयोगलगायत संवैधानिक निकायका प्रतिनिधिसँग छलफल भइरहेको छ’, विज्ञप्तिमा भनिएको छ ।
प्रधानमन्त्री पुष्पकमल दाहालले ६ दिनअघि संघीय राजधानीमा एक कार्यक्रमका बीच जनगणनाको नतिजा सार्वजनिक गरेका थिए ।
