काठमाडौं, चैत १४ । सत्ता बाँडफाँडको टुङ्गो लगाउन सत्तारुढ दलको बैठक आज मंगलबार बस्ने भएको छ ।
प्रधानमन्त्रीको सरकारी निवास बालुवाटारमा सोमबार बसेको सत्तारुढ गठबन्धनका शीर्ष नेताहरुको बैठकले प्रधानमन्त्री पुष्पकमल दाहाललाई संसदमा विश्वासको मतका लागि समर्थन गर्ने दलको बैठक अपराह्न ४ बजे बोलाउने सहमति गरेको प्रधानमन्त्री दाहालका प्रेस विज्ञ मनहरी तिमिल्सिनाले जानकारी दिए ।
भेटमा प्रधानमन्त्री तथा नेकपा (माओवादी केन्द्र)का अध्यक्ष दाहाल, नेपाली काँग्रेसका सभापति शेरबहादुर देउवा र नेकपा (एकीकृत समाजवादी)का अध्यक्ष माधवकुमार नेपाल सहभागी थिए ।
तिम्सिनाले मंगलबारको बैठकमा मन्त्रिपरिषद् विस्तारलगायतका विषयमा छलफल हुने बताए । सोमबारसम्म मन्त्रिपरिषद् विस्तार हुने भनिए पनि सत्तारुढ दलका नेताहरूले मन्त्रीमण्डलमा सहमति जुटाउन नसकेपछि त्यसमा ढिलाइ भएको बताएका छन् ।
सत्तारुढ गठबन्धनमा नेपाली कांग्रेस, नेकपा (माओवादी केन्द्र), राष्ट्रिय स्वतन्त्र पार्टी, जनता समाजवादी पार्टी, जनता पार्टी, नागरिक उन्मुक्ति पार्टी, लोकतान्त्रिक समाजवादी पार्टी लगायतका दल छन् ।
