खैरेनीटार, चैत १० । प्रधानसेनापति प्रभुराम शर्माले सैनिक कल्याणकारी कोष पूर्व सैनिकको जीवनस्तर उकास्नका लागि समर्पित भएको बताएको छ ।
नेपाली सेनाको ३ नंं ब्रिगेडद्वारा आज खैरेनीटारमा आयोजित कार्यक्रममा प्रधानसेनापति शर्माले नेपाली सेनालाई सक्षम, क्रियाशील र आत्मनिर्भर भएको हेर्न चाहेको आफ्नो नियत स्पष्ट पारे ।
‘लाभार्थीका आकांक्षा र अपेक्षा असीमित भए पनि नेपाली सेनाले आफ्नो सीमित स्रोतसाधनको उपयोग गरी लाभग्राहीको जीवनस्तर उकास्न प्रयासरत रहेको छ,’ शर्माले भने ।
स्मरण रहोस्, शर्माले २०२२ अप्रिलमा सन् १९७५ मा स्थापना भएको सेना कोषमा सोही वर्षको पुस मसान्तसम्म ६३ अर्ब ९७ करोड रुपैयाँ रहेको जानकारी दिएका थिए ।
लेफ्टिनेन्ट रथी सरोजप्रताप राणाले पूर्व सैनिकहरुले दिएको योगदान र अनुशासनले संस्थालाई थप गौरवान्वित गरेको बताए ।
कोषका प्रमुख कार्यकारी अधिकृत गौरव तण्डुलले नेपाली सेनाले सञ्चालित कल्याणकारी कार्यक्रमअन्तर्गत नेपाल इन्भेष्टमेन्ट मेगा बैंकसँगको सहकार्यमा ३२ हजार ७७३ पूर्वसैनिक र उनीहरुका परिवारले रु ७ अर्बभन्दा बढीको सहुलियतपूर्ण ऋणमा विभिन्न आयोजना सञ्चालन गर्दै आएको जानकारी दिए ।
नेपाल राष्ट्रिय भूतपूर्व सेना संघका अध्यक्ष दिगम्बर राणाले नेपाली सेनाले सञ्चालित कल्याणकारी कार्यक्रमले पूर्वसैनिक र उनीहरुका परिवारको सामाजिक–आर्थिक स्तरमा प्रत्यक्ष तथा अप्रत्यक्ष रुपमा सहयोग पुर्याएको बताए ।
कार्यक्रममा गोरखा, लमजुङ र तनहुँ जिल्लाका ६ हजार ४०० पूर्व सैनिकको सहभागिता रहेको थियो ।
सो अवसरमा शारीरिक अपाङ्गता भएका व्यक्तिलाई ह्वीलचेयर वितरण गरिएको थियो भने एकल महिला तथा पूर्व सैनिकलाई अभिनन्दन गरिएको थियो । त्यस्तै कार्यक्रममा साना तथा मझौला उद्यमीहरुलाई समेत सम्मान गरिएको थियो ।
