काठमाडौं, चैत ८ । प्रधानमन्त्री पुष्पकमल दाहालले सरकारको निर्देशनअनुसार भर्खरै प्रहरीको एआईजीमा बढुवा भएका ५ प्रहरी अधिकृतसँग भेट गरेका छन् ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा प्रचण्डले बढुवा भएका एआइजीहरुलाई बधाई दिँदै सुशासन र समृद्धिका लागि सरकारको अभियानमा साथ दिन आग्रह गरे ।
प्रहरी महानिरीक्षक (आईजीपी) धिरजप्रताप सिंहसहित ५ एआईजी सिंहदरबार पुगेका चार दिनपछि आईजीपीको नियुक्ति हुन लागेको हो । आईजीपी बढुवा हुनुभन्दा चार दिनअघि बुधबार उनीहरुले एआईजीको ब्याज लगाएका थिए ।
बैठकमा सहभागी एक अधिकारीका अनुसार दाहालले बढुवा भएका सबै पदाधिकारी राम्रो रहेको बताउँदै संस्था र सरकारको छवि उकास्न काम गर्न निर्देशन दिएका छन् ।
‘अहिले बढुवा भएका ५ जनामध्ये एक जना आईजीपी हुनेछन्, मिलेर काम गरौँ’, प्रधानमन्त्रीको भनाइलाई उद्धृत गर्दै स्रोतले भन्यो, ‘एआईजी मेरिटका आधारमा बढुवा भएको हो, कसैले गुनासो गरेको छैन ।
उनले यस वर्ष एआईजीको बढुवा निर्विवाद भएको भन्दै खुशी पनि व्यक्त गरेको अधिकारीले बताए ।
अहिले प्रधानमन्त्री दाहालले गृह मन्त्रालयको जिम्मेवारी पनि सम्हालिरहेका छन् । मंसिर १३ गते मन्त्रालयले डीआईजीहरू वसन्तबहादुर कुँवर, टेकप्रसाद राई, दीपक थापा, श्यामलाल ज्ञवाली र किरण बज्राचार्यलाई एआईजीमा बढुवा गर्न सिफारिस गरेको थियो ।
त्यसअघि तत्कालीन डीआईजी अशोक सिंह बढुवाको आकांक्षी थिए । तर, जन्ममिति विवादमा परेपछि उनले राजीनामा दिएका थिए ।
Published Date: 22 March 2023
