काठमाडौं, फागुन २३ । बैंक तथा वित्तीय संस्थाले कर्जाको रकम असुल गर्न संघर्ष गरिरहेको बेला बचत तथा ऋण सहकारी संस्था (साकोस) पनि सञ्चालकहरुले लिएको कर्जाका कारण यस्तै समस्यामा परेका छन् । ।
नेपाल बचत तथा ऋण सहकारी संघ (नेफ्स्कुन) का अनुसार सञ्चालक समिति र साकोसका उपसमितिका सदस्यहरुलाई उपलब्ध गराइएको ठूलो रकम खराब कर्जामा जाने जोखिममा परेको छ ।
नेफ्स्कुनका प्रमुख कार्यकारी अधिकृत प्रकाशप्रसाद पोखरेलले आइतबार एक कार्यक्रममा बोल्दै साकोसका सञ्चालक समितिले लिएको ऋण असुली झनै चुनौतीपूर्ण बन्दै गएको बताए ।
पछिल्लो समय बढ्दो संख्यामा सहकारीहरु आर्थिक संकटमा फसेका छन् भने अधिकांशमा तरलताको समस्या देखिएको छ । विगतमा पनि ठूलो संख्यामा सहकारीले घरजग्गा कारोबारमा बढी संलग्नताका कारण यस्तै समस्या भोग्नुपरेको थियो । धेरैजसो अवस्थामा सहकारीका उच्च तहका पदाधिकारीले व्यक्तिगत प्रयोजनका लागि यी सहकारीबाट चर्को ऋण लिएको पाइएको छ ।
यसैबीच नेफ्स्कनले बुधबारदेखि सहकारीका व्यवस्थापन प्रमुखहरूको दुईदिने गोष्ठी आयोजना गर्दैछ । सातवटा पेपर प्रस्तुतीकरण र ४५० भन्दा बढी सहभागीको भेला रहेको सम्मेलनमा मुख्यतया सहकारी क्षेत्रमा देखिएका समसामयिक समस्या समाधानमा केन्द्रित रहने साकोसको छाता संगठनले जनाएको छ ।
