काठमाडौं, फागुन १९ । जिल्ला प्रहरी परिसर काठमाडौंले होलीलाई सुरक्षित रुपमा मनाउन सर्वसाधारणलाई अनुरोध गरेको छ ।
प्रहरी परिसर, काठमाडौंले बिहीबार एक सूचना जारी गर्दै होलीलाई सभ्य, स्वस्थ र मर्यादित ढंगले मनाउन आग्रह गरेको छ । प्रहरीले होली पर्वको नाममा अव्यवस्थित गतिविधि नगर्न र नजिकका आफन्तसँग मात्र होली खेल्न आग्रह गरेको छ ।
जिल्ला प्रहरी परिसर काठमाडौंका प्रवक्ता प्रहरी उपरीक्षक सीताराम रिजालले कसैले आफ्नो इच्छाविपरीत रङ, मोबाइल, केमिकल र फोहोर पानी प्रयोग गरेमा कानुन बमोजिम कारबाही गरिने बताए ।
महँगो गहना लगाएर होली नखेल्न, ट्राफिक नियमको कडाई गर्न, मदिरा सेवन गरी सवारी साधन नचलाउन, अपाङ्ग, महिला, बालबालिका, ज्येष्ठ नागरिक र पर्यटकलाई कुनै किसिमले दुव्र्यवहार नगर्न प्रहरीले आग्रह गरेको छ ।
रेलिङविना छत र सडकमा होली नखेल्न, भीडभाड हुने ठाउँमा नखेल्न प्रहरीले अनुरोध गरेको छ । कुनै अपराधिक गतिविधि हुन लागेको वा भएको थाहा भएमा तत्काल नेपाल प्रहरीको हटलाइन नम्बर १०० मा खबर गर्न प्रहरीले अनुरोध गरेको छ ।
