भक्तपुर नगरका सडकमा ‘कुकुरको आतंक’! भुस्याहा कुकुरको बथानले बढायो नागरिकमा त्रास

भक्तपुर, भदौ २ । भक्तपुर नगर क्षेत्रमा भुस्याहा कुकुरको बढ्दो आतंकका कारण रातको समयमा सडकमा हिँडडुल गर्ने सर्वसाधारण असुरक्षित महसुस गर्न थालेका छन्। साँझ ८ बजेपछि सडकमा समूह बनाएर डुल्ने कुकुरले पैदलयात्री तथा सवारीसाधनलाई लखेट्ने, झम्टिने र टोक्नेसम्मका घटना हुन थालेपछि स्थानीयमा त्रास बढेको हो।

विशेषगरी राति काम सकेर घर फर्किने कर्मचारी, विद्यार्थी, महिला, ज्येष्ठ नागरिक तथा बालबालिका जोखिममा परेको स्थानीयको भनाइ छ। सडकमा अचानक कुकुरको बथानले पछ्याउन थालेपछि दुर्घटनाको जोखिमसमेत बढेको उनीहरू बताउँछन्।

स्थानीयका अनुसार भक्तपुरका विभिन्न टोल, गल्ली तथा मुख्य सडक आसपासमा कुकुरको संख्या उल्लेख्य रूपमा बढेको छ। कतिपय स्थानमा दर्जनौँको समूहमा कुकुर सडकमा डुल्ने र मानिस तथा मोटरसाइकल पछ्याउने गरेका छन्। कुकुरको डरकै कारण रातको समयमा पैदल हिँड्नसमेत असहज अवस्था सिर्जना भएको स्थानीयको गुनासो छ।

समस्या सडक सुरक्षामा मात्र सीमित छैन। सडक किनार तथा सार्वजनिक स्थानमा राखिएको फोहोर कुकुरले छरपस्ट पार्दा नगरको सरसफाइमा समेत प्रत्यक्ष असर परेको छ। फोहोरको थुप्रो आसपास कुकुरको बथान जम्मा हुने र त्यसपछि फोहोर झन् फैलिने गरेको स्थानीय बताउँछन्।

‘समस्या देखिँदै आएको छ, समाधान कहिले?’

स्थानीयवासीले लामो समयदेखि देखिँदै आएको समस्याप्रति सम्बन्धित निकाय गम्भीर बन्नुपर्ने माग गरेका छन्। उनीहरूले कुकुरलाई नियन्त्रण गर्ने नाममा अमानवीय व्यवहार नगरी वैज्ञानिक तथा दीर्घकालीन व्यवस्थापनको नीति अपनाउनुपर्ने बताएका छन्।

बन्ध्याकरण, नियमित खोप, उपचार तथा उद्धारसँगै सडकमा रहेका कुकुरका लागि सुरक्षित आश्रयको व्यवस्था गर्नुपर्ने उनीहरूको माग छ। साथै, खुला रूपमा फोहोर फाल्ने प्रवृत्ति नियन्त्रण र नियमित सरसफाइमार्फत कुकुर सडकमा जम्मा हुने कारणसमेत न्यूनीकरण गर्नुपर्ने स्थानीयको सुझाव छ।

भक्तपुर नगरपालिकासहित सम्बन्धित निकायले तत्काल कदम नचाले रातको समयमा नागरिकको आवागमन थप जोखिमपूर्ण बन्न सक्ने स्थानीयको चेतावनी छ।

नागरिकको सुरक्षा, सार्वजनिक स्वास्थ्य र नगरको सरसफाइसँग प्रत्यक्ष जोडिएको यो समस्यालाई बेवास्ता नगरी तत्काल प्रभावकारी कदम चाल्न स्थानीयवासीले सम्बन्धित निकायसँग माग गरेका छन्।