काठमाडौँ, साउन २१ । होटल सिराईचुली लिमिटेडले सर्वसाधारणका लागि प्रारम्भिक सार्वजनिक निष्कासन (आईपीओ) जारी गर्ने प्रस्तावसहित तेस्रो वार्षिक साधारण सभा आह्वान गरेको छ। कम्पनीको सञ्चालक समितिको साउन १७ गते बसेको बैठकले आगामी भदौ १४ गते सभा आयोजना गर्ने निर्णय गरेको हो।
सभामा सर्वसाधारणलाई कम्पनीको स्वामित्वमा सहभागी गराउने उद्देश्यले आईपीओ निष्कासनसम्बन्धी विशेष प्रस्ताव पेश गरिनेछ। साथै, आईपीओबाट संकलन हुने रकमको उपयोग योजना स्वीकृत गर्ने तथा निष्कासन प्रक्रियासम्बन्धी सम्पूर्ण आवश्यक कार्य अघि बढाउन सञ्चालक समितिलाई पूर्ण अधिकार प्रदान गर्ने प्रस्तावमाथि पनि छलफल तथा निर्णय गरिने कम्पनीले जनाएको छ।
यसैगरी, सभाले गत आर्थिक वर्षको लेखापरीक्षण गरिएको वित्तीय विवरण, वार्षिक प्रतिवेदन तथा अन्य नियमित एजेन्डाहरू पनि पारित गर्नेछ।
कम्पनीले आईपीओमार्फत संकलित पुँजीलाई व्यवसाय विस्तार, सेवा क्षमता अभिवृद्धि तथा आवश्यक पूर्वाधार विकासमा परिचालन गर्ने योजना बनाएको जनाएको छ।
