लगातार दोस्रो दिन सुन–चाँदीको मूल्यमा गिरावट, सुन तोलामा ९०० रुपैयाँ सस्तो

काठमाडौँ, असार २२ । नेपाली बजारमा सुन तथा चाँदीको मूल्य लगातार दोस्रो दिन पनि घटेको छ। नेपाल सुनचाँदी व्यवसायी महासंघका अनुसार सोमबार सुनको मूल्य प्रतितोला ९०० रुपैयाँले घटेको हो।

महासंघले सार्वजनिक गरेको नयाँ मूल्यसूचीअनुसार आज छापावाल सुन प्रतितोला दुई लाख ८९ हजार ४०० रुपैयाँमा कारोबार भइरहेको छ। अघिल्लो कारोबार दिन अर्थात् आइतबार सुनको मूल्य प्रतितोला दुई लाख ९० हजार ३०० रुपैयाँ कायम भएको थियो।

त्यस्तै, चाँदीको मूल्य पनि सामान्य घटेको छ। सोमबार चाँदी प्रतितोला २० रुपैयाँले घटेर चार हजार ५८५ रुपैयाँमा कारोबार भइरहेको महासंघले जनाएको छ। आइतबार चाँदी प्रतितोला चार हजार ६०५ रुपैयाँमा किनबेच भएको थियो।

पछिल्ला दुई दिनदेखि नेपाली बजारमा सुन तथा चाँदी दुवैको मूल्य निरन्तर ओरालो लागिरहेको छ। अन्तर्राष्ट्रिय बजारमा भइरहेको मूल्य उतारचढावको प्रभाव स्वदेशी बजारमा पनि परेको व्यवसायीहरू बताउँछन्।