काठमाडौँ, असार २२ । देशभर मनसुनी प्रणाली सक्रिय रहेकाले आज पनि अधिकांश क्षेत्रमा वर्षाको सम्भावना रहेको छ। जल तथा मौसम विज्ञान विभागअन्तर्गत मौसम पूर्वानुमान महाशाखाले केही प्रदेशका पहाडी तथा तराई क्षेत्रमा भारी वर्षा र हावाहुरीको जोखिम रहेकाले आवश्यक सतर्कता अपनाउन आग्रह गरेको छ।
महाशाखाका अनुसार हाल मनसुनको न्यून चापीय रेखा नेपालको पूर्वी भूभागमा सरदर स्थानभन्दा केही दक्षिणतर्फ र पश्चिमी भूभागमा सरदर स्थानकै आसपास अवस्थित छ। यसको प्रभावले लुम्बिनी, कर्णाली र सुदूरपश्चिम प्रदेशका अधिकांश स्थानमा तथा कोशी, बागमती र गण्डकी प्रदेशका पहाडी क्षेत्रमा सामान्यदेखि पूर्ण बदली रहेको छ।
हाल कर्णाली र सुदूरपश्चिम प्रदेशका धेरै स्थानमा तथा कोशी, बागमती, गण्डकी र लुम्बिनी प्रदेशका केही स्थानमा मेघगर्जन र चट्याङसहित हल्कादेखि मध्यम वर्षा भइरहेको मौसम महाशाखाले जनाएको छ।
आज दिउँसो देशका हिमाली तथा पहाडी भूभागका केही स्थानमा मेघगर्जन, चट्याङसहित हल्कादेखि मध्यम वर्षा हुने सम्भावना छ। उच्च हिमाली क्षेत्रमा हल्का हिमपात हुन सक्ने अनुमान पनि गरिएको छ। साथै बागमती, गण्डकी, लुम्बिनी र सुदूरपश्चिम प्रदेशका तराईका केही स्थान तथा कोशी र मधेश प्रदेशका एक–दुई स्थानमा पनि वर्षा हुने सम्भावना रहेको छ।
मधेश प्रदेशका साथै कोशी र बागमती प्रदेशका तराई क्षेत्रका केही स्थानमा दिउँसो तीव्र गतिको हावाहुरी चल्न सक्ने भएकाले सर्वसाधारणलाई विशेष सावधानी अपनाउन मौसमविद्हरूले आग्रह गरेका छन्।
रातिको समयमा पनि देशभर सामान्यदेखि पूर्ण बदली रहने अनुमान गरिएको छ। कोशी, गण्डकी, लुम्बिनी र सुदूरपश्चिम प्रदेशका पहाडी तथा तराई क्षेत्रका केही स्थानमा तथा मधेश, कर्णाली र बागमती प्रदेशका थोरै स्थानमा मेघगर्जन र चट्याङसहित वर्षा हुने सम्भावना रहेको छ।
महाशाखाका अनुसार विशेषगरी कोशी, गण्डकी र सुदूरपश्चिम प्रदेशका एक–दुई स्थानमा राति भारी वर्षा हुन सक्ने भएकाले नदी तथा खोलानालामा पानीको बहाव बढ्न सक्ने, पहिरो र डुबानको जोखिम रहने सम्भावना छ। त्यसैले जोखिमयुक्त क्षेत्रमा बसोबास गर्ने नागरिक तथा यात्रुलाई आवश्यक सतर्कता अपनाउन आग्रह गरिएको छ।
Published Date: 06 July 2026
