काठमाडौँ, असार २२ । स्टार स्ट्राइकर एर्लिङ हालान्डको उत्कृष्ट प्रदर्शनको प्रेरणामा नर्वेले फिफा विश्वकप २०२६ मा नयाँ इतिहास रचेको छ। न्युयोर्कस्थित मेटलाइफ स्टेडियममा सम्पन्न अन्तिम–१६ को रोमाञ्चक प्रतिस्पर्धामा पाँच पटकको विश्वकप विजेता ब्राजिललाई २–१ गोल अन्तरले पराजित गर्दै नर्वे पहिलो पटक विश्वकपको क्वार्टरफाइनलमा प्रवेश गरेको हो।
खेलभर दबाब सिर्जना गरेको ब्राजिलले पहिलो हाफमै अग्रता लिने अवसर पाए पनि नर्वेका गोलरक्षक ओर्यान निल्यान्डले ब्रुनो गुइमारेसको पेनाल्टी प्रहार उत्कृष्ट ढङ्गले बचाउँदै टोलीलाई संकटबाट जोगाए। त्यसपछि पहिलो हाफ गोलरहित बराबरीमा सकिएको थियो।
दोस्रो हाफमा नर्वेले खेलमा पकड जमायो। निर्धारित समय सकिन ११ मिनेट बाँकी रहँदा एर्लिङ हालान्डले लगातार दुई गोल गर्दै नर्वेलाई ऐतिहासिक जित दिलाए। इन्जुरी समयको अन्तिम मिनेटमा ब्राजिलका नेयमारले पेनाल्टीमार्फत एक गोल फर्काए पनि त्यो टोलीको हार टार्न पर्याप्त भएन।
यस अप्रत्याशित नतिजासँगै उपाधिको प्रमुख दाबेदार मानिएको ब्राजिल सन् १९९० यता पहिलो पटक विश्वकपको अन्तिम–१६ चरणबाटै बाहिरिएको छ।
हालान्डले यस खेलमा थप दुई गोल गरेसँगै जारी विश्वकपमा आफ्नो गोल सङ्ख्या सात पुर्याएका छन्। यससँगै उनले गोल्डेन बुटको दौडमा लियोनेल मेस्सीसँग सात गोलको बराबरी गरेका छन्।
ऐतिहासिक जितपछि उत्साहित नर्वेले अब जुलाई ११ मा मियामीमा हुने क्वार्टरफाइनल खेलमा सह–आयोजक मेक्सिको र इङ्गल्यान्डबीचको विजेता टोलीसँग प्रतिस्पर्धा गर्नेछ।
Published Date: 06 July 2026
