काठमाडौं, असार १९ । मुलुकभर मनसुनी वायुको प्रभाव बलियो बनेसँगै आज पनि देशका अधिकांश क्षेत्रमा वर्षा हुने जल तथा मौसम पूर्वानुमान महाशाखाले जनाएको छ। महाशाखाका अनुसार देशभरको मौसम सामान्यदेखि पूर्ण बदली रहनेछ भने विभिन्न क्षेत्रमा मेघगर्जन, चट्याङ र वर्षाको सम्भावना रहेको छ।
हाल देशका अधिकांश भूभागमा मौसम बदली रहेको छ। विशेषगरी बागमती, कोशी र लुम्बिनी प्रदेशका केही स्थानमा मेघगर्जन तथा चट्याङसहित मध्यम वर्षा भइरहेको महाशाखाले जनाएको छ।
आज दिउँसो देशभर सामान्यदेखि पूर्ण बदली रहने अनुमान गरिएको छ। यस अवधिमा पहाडी तथा हिमाली क्षेत्रका थोरै स्थानमा मेघगर्जन र चट्याङसहित मध्यम वर्षा हुने सम्भावना छ। साथै उच्च हिमाली भेगका केही स्थानमा हल्का हिमपातको समेत सम्भावना रहेको मौसमविद्हरूले बताएका छन्।
पहाडी क्षेत्रसँगै तराईका विभिन्न भूभागमा पनि मेघगर्जन र चट्याङसहित मध्यम वर्षा हुन सक्ने अनुमान गरिएको छ। मनसुन सक्रिय रहेकाले अधिकांश क्षेत्रमा मौसम प्रतिकूल रहने देखिएको छ।
रातिको समयमा पनि मौसमको यही क्रम जारी रहने महाशाखाले जनाएको छ। राति देशभर सामान्यदेखि पूर्ण बदली रहनेछ। कोशी, बागमती र गण्डकी प्रदेशका हिमाली क्षेत्रका केही स्थान तथा कर्णाली, सुदूरपश्चिम र लुम्बिनी प्रदेशका हिमाली भेगमा मेघगर्जन, चट्याङसहित मध्यम वर्षा तथा हिमपातको सम्भावना रहेको छ।
त्यसैगरी पहाडी र तराई क्षेत्रका केही स्थानमा रातिको समयमा पनि चट्याङसहित मध्यम वर्षा हुन सक्ने पूर्वानुमान गरिएको छ।
विशेषगरी कोशी, बागमती, गण्डकी र लुम्बिनी प्रदेशका पहाडी तथा तराई क्षेत्रका एक–दुई स्थानमा भारी वर्षाको सम्भावना रहेकाले महाशाखाले विशेष सतर्कता अपनाउन आग्रह गरेको छ। नदी तटीय क्षेत्र, डुबान तथा पहिरोको जोखिम भएका स्थानका बासिन्दालाई उच्च सावधानी अपनाउन र आवश्यक सतर्कता राख्न अनुरोध गरिएको छ।
Published Date: 03 July 2026
