अमेरिका अन्तिम १६ मा, बोस्नियामाथि २–० को शानदार जित

अमेरिकाको जितमा फोलारिन बालोगुन र मलिक टिलम्यानले एक–एक गोल गरे। खेलको ४५औं मिनेटमा बालोगुनले गोल गर्दै अमेरिकालाई अग्रता दिलाएका थिए। तर ६४औं मिनेटमा रातो कार्ड पाएपछि उनी मैदानबाट बाहिरिए र अमेरिका १० खेलाडीमा सीमित हुन पुग्यो।

एक खेलाडी कम हुँदा पनि अमेरिकाले उत्कृष्ट प्रदर्शन जारी राख्यो। खेलको ८२औं मिनेटमा टिलम्यानले पेनाल्टी क्षेत्र बाहिरबाट प्रहार गरेको आकर्षक फ्रिकिक सिधै जाली चुमाएपछि अमेरिकाले अग्रता दोब्बर बनायो। त्यसपछि थप गोल हुन नसक्दा अमेरिका २–० को जित निकाल्न सफल भयो।

यस जितसँगै अमेरिकाले २४ वर्षपछि विश्वकपको नकआउट चरणमा महत्त्वपूर्ण सफलता हात पारेको छ। यसअघि सन् २००२ को विश्वकपमा अमेरिका क्वार्टरफाइनलसम्म पुगेको थियो। त्यसयता भने टोली दोस्रो चरणबाटै बाहिरिँदै आएको थियो।

यो नतिजासँगै तीनै आयोजक राष्ट्र अमेरिका, मेक्सिको र क्यानडा अन्तिम १६ मा पुग्न सफल भएका छन्। अब क्वार्टरफाइनल प्रवेशका लागि अमेरिकाले बेल्जियमसँग प्रतिस्पर्धा गर्नेछ।