भक्तपुर, असार १७ । भक्तपुरको चाँगुनारायण नगरपालिका–२, दुवाकोट महांकाल चोकबाट बिलबिनाको करिब ८०० ग्राम चाँदीजस्ता देखिने विभिन्न गरगहना सहित एक जनालाई प्रहरीले नियन्त्रणमा लिएको छ।
मंगलबार दिउँसो करिब ३:२० बजे प्रहरी प्रभाग दुवाकोटबाट खटिएको प्रहरी टोलीले नियमित चेकजाँचका क्रममा बागमती प्रदेश ०२–०६५ प ७७९८ नम्बरको स्कुटर रोकी जाँच गरेको थियो।
जाँचका क्रममा स्कुटरको डिक्कीबाट बिल नभएको चाँदीजस्तो देखिने सेतो धातुका विभिन्न गरगहना अन्दाजी ८०० ग्राम फेला परेपछि स्कुटर चालक चाँगुनारायण नगरपालिका–२ निवासी २५ वर्षीय कनैया कुमार सुनारलाई नियन्त्रणमा लिइएको प्रहरीले जनाएको छ।
बरामद गरिएका गरगहना, स्कुटर तथा चालकलाई नियन्त्रणमा राखी घटनाबारे थप अनुसन्धान भइरहेको प्रहरीले जनाएको छ।
Published Date: 01 July 2026
