काठमाडौं, फागुन १२ । सरकारले ५५ वर्षभन्दा माथिका, रोग प्रतिरोधात्मक क्षमता कम भएका, ज्येष्ठ नागरिक र अग्रपंक्तिमा काम गर्नेलाई कोरोना भ्याक्सिनको १५ लाख बुस्टर डोज खुवाउने भएको छ ।
गत सोमबार कोरोना संक्रमण विरुद्ध थप डोज (बुस्टर डोज) को थप खोप नेपाल आएको थियो । ग्लोबल एलायन्स फर भ्याक्सिन एण्ड इम्युनाइजेसनले जर्मनी सरकारले उपलब्ध गराएको खोप कोभ्याक्स सुविधामार्फत नेपाललाई उपलब्ध गराएको हो ।
स्वास्थ्य तथा जनसङ्ख्या मन्त्रालयका सहायक प्रवक्ता समिरकुमार अधिकारीले हालै कोभिड–१९ विरुद्धको खोपको १५ लाख डोज उपलब्ध भइसकेको र प्राथमिकताका आधारमा सञ्चालन गर्ने काम पनि सुरु भएको जानकारी दिए ।
पहिलो डोजमा खोप नलिएकालाई पहिलो प्राथमिकता दिइने र बाँकी नागरिकलाई प्राथमिकताका आधारमा खोप लगाइने अधिकारीले बताए । उनले सम्बन्धित खोप केन्द्रमा खोप उपलब्ध गराउन समन्वय कायम गरिएको बताए ।
नागरिकले आफ्नो परिचय खुलाउने कागजपत्र लिएर खोप केन्द्रमा गएर सजिलै खोप लगाउन सक्ने अधिकारीले बताए । उनले खोप लगाउन बाँकी रहेका र बुस्टर डोज नपाएको नागरिकलाई पनि खोप लगाउन आग्रह गरे । काठमाडौंको टेकुस्थित शुक्रराज ट्रपिकल तथा सरुवा अस्पतालमा बिहीबारदेखि फाइजरको बुस्टर डोज खुवाइँदै छ ।
Published Date: 24 February 2023
