काठमाडौँ, असार ३ । बुधबार सेयरबजार परिसूचक नेप्से स्थिर रहेको छ । आज नेप्से ०.०८ को झिनो अंकले बढेर २ हजार ७०५.५३ विन्दुमा कायम भएको हो । आज सेयरबजारमा ३५२ कम्पनीका सेयरमूल्य कारोबार भएका छन् । यीमध्ये १२६ कम्पनीका सेयरमूल्यमा सुधार आएको छ भने १३१ कम्पनीका सेयरमूल्यमा गिरावट आएको छ ।
आज कुल ८३ लाख ७५ हजार ४७१ कित्ता सेयर ३ अर्ब ६३ करोड ७५ लाख ८९ हजार रुपैयाँमा किनबेच भएको छ । कारोबार रकम मंगलबारको तुलनामा १० प्रतिशतले कमी हो । विकास बैंक, वित्त, जलविद्युत, लगानी र उत्पादनशील तथा प्रशोधन समूहका परिसूचक बढेका छन् ।
वाणिज्य बैंक, होटेल तथा पर्यटन, जीवन बीमा, लघुवित्त, म्युचुअल फण्ड, निर्जीवन बीमा, व्यापार तथा अन्य समूहका परिसूचकमा भने गिरावट आएको छ । सोपान फर्मास्युटिकल्स्, एपोलो हाइड्रोपावर तथा बुङ्गल हाइड्रोको सेयरधनीले सबैभन्दा बढी कमाएका छन् । सबैभन्दा बढी गुमाउनेमा भने एनएमवीका डिवेञ्चरमा लगानीकर्ता, प्राइम डिवेञ्चर तथा एसवीएल डिवेञ्चरका लगानीकर्ता रहेका छन् ।
Published Date: 17 June 2026
