काठमाडौँ, असार २ । सेयरबजार परिसूचक नेप्सेमा लगातार चारदिनयता गिरावट आएको छ । मंगलबार नेप्से ६.३१ अंकले घटेर २ हजार ७०५.४५ विन्दुमा कायम भएको छ । आज सेयरबजारमा ३५५ कम्पनीका सेयर कारोबार भएका छन् । यी मध्ये ८० कम्पनीका सेयरमूल्य बढेका छन् भने १७७ कम्पनीका सेयरमूल्यमा गिरावट आएको छ ।
आज कुल १ करोड ७ लाख ८ हजार ५९६ कित्ता सेयर ४ अर्ब ४ करोड ७८ लाख ५८ हजार रुपैयाँमा किनबेच भएको छ । कारोबार रकम सोमबारको तुलनामा ८ प्रतिशतले कमी हो । आज सेयरबजारमा सूचीकृत समूहमध्ये म्युचुअल फण्ड तथा व्यापार समूहका परिसूचक मात्रै सकारात्मक रहेका छन् । अरु बाँकी सबै समूहका परिसूचक ओरालो लागेका छन् ।
सबैभन्दा धेरै वित्त समूहको परिसूचक ०.६२ प्रतिशतले घटेको छ । सोपान फर्मास्युटिकल्स्, एपोलो हाइड्रोपावर तथा दोल्ती पावर कम्पनीका सेयरधनीले सबैभन्दा धेरै कमाएका छन् । सबैभन्दा धेरै गुमाउनेमा भने सयपत्री हाइड्रोपावर लिमिटेड, युनिक नेपाल लघुवित्त वित्तीय संस्था तथा एनआईएमवी डिवेञ्चरमा लगानीकर्ता रहेका छन् ।
