काठमाडौँ, जेठ २७ । सेयरबजार परिसूचक नेप्सेमा सामान्य सुधार आएको छ । बुधबार नेप्से २.५७ अंकले बढेर २ हजार ७३६.१७ विन्दुमा कायम भएको हो । आज सेयरबजारमा ३५६ कम्पनीका सेयर कारोबार भएका छन् । यी मध्ये १२७ कम्पनीका सेयरमूल्य बढेका छन् भने १३४ कम्पनीका सेयरमूल्यमा गिरावट आएको छ । आज कुल ९२ लाख ८३ हजार ३२६ कित्ता सेयर ४ अर्ब २९ करोड ७४ लाख ६४ हजार रुपैयाँमा किनबेच भएको छ ।
कारोबार रकम मंगलबारको तुलनामा ३३ प्रतिशतले कमी हो । आज सेयरबजारमा सूचीकृत समूहमध्ये वाणिज्य बैंक, विकास बैंक, वित्त, होटेल तथा पर्यटन, जलविद्युत, उत्पादनशील तथा प्रशोधन र म्युचुअल फण्ड समूहको परिसूचक सकारात्मक रहेका छन् ।
लगानी, जीवन बीमा, लघुवित्त, निर्जीवन बीमा, व्यापार तथा अन्य समूहका परिसूचक भने ओरालो लागेका छन् । कालिञ्चोक हाइड्रोपावर लिमिटेड, सोपान फर्मास्युटिकल्स् लिमिटेड तथा एपोलो हाइड्रोपावर लिमिटेडका सेयरधनीले सबैभन्दा बढी कमाएका छन् ।
सबैभन्दा बढी गुमाउनेमा भने प्रभु बैंकको डिवेञ्चरमा लगानीकर्ता, उपकार लघुवित्त वित्तीय संस्था तथा अपर लोहोरे खोला हाइड्रोेपावर कम्पनीका सेयरधनी रहेका छन् ।
Published Date: 10 June 2026
