काठमाडौं, वैशाख ३१ । सरकारले वास्तविक भूमिहीन सुकुम्बासी परिवारलाई जग्गाधनी प्रमाणपुर्जा (लालपुर्जा) उपलब्ध नगरुञ्जेल अस्थायी रूपमा मासिक १५ हजार रुपैयाँ घरभाडा उपलब्ध गराउने तयारी गरेको जनाएको छ ।
प्रतिनिधि सभाअन्तर्गतको राज्य व्यवस्था तथा सुशासन समितिको बिहीबार बसेको बैठकमा सरकारी प्रतिनिधिहरूले यस्तो जानकारी दिएका हुन् । समिति सभापति हरि ढकालका अनुसार शहरी विकास मन्त्रालय र सङ्घीय मामिला तथा सामान्य प्रशासन मन्त्रालयले सुकुम्बासी व्यवस्थापनको प्रगति विवरण प्रस्तुत गर्दै नयाँ योजनाबारे जानकारी गराएका हुन् ।
होल्डिङ सेन्टरमा ‘स्क्रिनिङ’ जारी
सरकारले हाल काठमाडौंका विभिन्न होल्डिङ सेन्टरमा रहेका भूमिहीन परिवारको पहिचान प्रक्रिया अर्थात् ‘स्क्रिनिङ’ गरिरहेको जनाएको छ । यो प्रक्रिया पूरा भएपछि ‘फास्ट ट्र्याक’ प्रणालीमार्फत लालपुर्जा वितरण गर्ने लक्ष्य राखिएको छ । शहरी विकास मन्त्रालयले यस योजनाका लागि आवश्यक आर्थिक स्रोत सुनिश्चित भइसकेको जानकारी समितिलाई दिएको बताइएको छ ।
Published Date: 14 May 2026
