काठमाडौँ, वैशाख २५ । नेपाली बजारमा आज पनि सुनचाँदीको मूल्यमा वृद्धि देखिएको छ।
पछिल्ला दुई दिनमा उल्लेख्य वृद्धि भएको सुनको भाउ आज फेरि प्रतितोला १ हजार ३ सय रुपैयाँले बढेको हो।
आज सुनको मूल्य प्रतितोला २ लाख ९९ हजार ९ सय रुपैयाँ कायम भएको छ। यसअघि बिहीबार सुन १ हजार ८ सय रुपैयाँ र बुधबार ५ हजार ८ सय रुपैयाँले महँगिएको थियो।
तीन दिनको अवधिमा मात्रै सुनको मूल्य कुल ८ हजार ९ सय रुपैयाँले बढिसकेको छ। अघिल्लो दिन सुन प्रतितोला २ लाख ९८ हजार ६ सय रुपैयाँमा कारोबार भएको थियो।
चाँदीको मूल्य पनि आज उकालो लागेको छ। प्रतितोला १२० रुपैयाँले बढेर चाँदीको भाउ ५ हजार २७५ रुपैयाँ पुगेको छ।
हिजो चाँदी ५ हजार १५५ रुपैयाँमा कारोबार भएको थियो।
यसअघि माघ १५ गते सुनको मूल्य एकैदिन २० हजार ५ सय रुपैयाँले बढ्दै प्रतितोला ३ लाख ३९ हजार ३ सय रुपैयाँ पुगेको थियो। नेपाली बजारमा यो हालसम्मकै उच्च मूल्य मानिन्छ।
यस्तै, माघ १८ गते चाँदीको मूल्य प्रतितोला १ हजार ५ सय ६५ रुपैयाँले घटेको थियो, जुन अहिलेसम्मकै ठूलो गिरावट हो। तर, माघ १५ गते नै चाँदीको मूल्य ७ हजार ५०५ रुपैयाँ पुगेको थियो, जुन यसको सबैभन्दा उच्च रेकर्ड हो।
