भक्तपुर, वैशाख १९ । भक्तपुरको ऐतिहासिक कला, संस्कृति र परम्परागत उद्योगलाई आन्तरिक तथा बाह्य पर्यटनसँग जोड्ने उद्देश्यका साथ क्रियाशील अभियान ‘गो लोकल’ र सञ्चार तथा नेतृत्व विकासमा समर्पित ‘भक्तपुर टोस्टमास्टर्स क्लब बीच एक विशेष अन्तरक्रिया कार्यक्रम सम्पन्न भएको छ । राधेराधेस्थित होटल रोयल थाईमा आयोजित उक्त कार्यक्रममा दुवै समूहबीच भक्तपुरको मौलिकता संरक्षण र प्रवर्द्धनका लागि सहकार्य गर्ने छलफल भएको छ ।
कार्यक्रममा भक्तपुर टोस्टमास्टर्सका प्रतिनिधिहरू सुदिप हाडा, ईश्वर पलिखेल, निरव कायष्ठ, अनिल पाउ र सन्दिप धवा लगायतले प्रभावकारी बैठक सञ्चालनका प्राविधिक पक्षबारे जानकारी गराए । कार्यक्रममा छोटो समयमा नतिजामुखी बैठक कसरी गर्ने र वक्ताहरूको प्रस्तुतिमा रहेका कमी-कमजोरीलाई रचनात्मक ढंगले कसरी औंल्याउने (Evaluation) र नेतृत्व क्षमता अभिवृद्धि गर्ने उपायहरू बारे प्रयोगात्मक सुझावहरू दिएको थियो।
त्यसैगरी गो लोकलका संयोजक विरेन्द्र जतिले परम्परागत उद्योगहरूलाई कसरी जीवन्त राख्न सकिन्छ र तिनलाई पर्यटकीय आकर्षणको केन्द्र कसरी बनाउने भन्नेबारे संस्थाले गरिरहेका प्रयासहरू प्रष्ट पारे । साथै उनले गो लोकल ओझेलमा परेका रैथाने सीप, कला र उत्पादनलाई आधुनिक बजार र पर्यटनसँग जोड्ने एउटा साझा मञ्च हो भने। त्यसैगरी सह-संयोजक रामसुन्दर भेलेले विगतमा सञ्चालित ‘भक्तपुर बाई नाइट
कार्यक्रमको अनुभव साट्दै भक्तपुरलाई रात्रीकालीन पर्यटकीय गन्तव्य बनाउन सास्कृतिक सम्पदा यात्रालाई निरन्तरता दिनुपर्ने बताए । सदस्य रमिला दुवालले गो लोकलद्वारा प्रकाशित पुस्तक र भिडियोमा समेटिएका १५ वटा मौलिक उत्पादनहरूबारे संक्षिप्त जानकारी दिए । त्यसैगरी सदस्य श्रीजना कक्षपतिले गोलोकल अभियानका अन्य विविध गतिविधि र स्थानीय अर्थतन्त्रमा यसले पुर्याउन सक्ने योगदानबारे चर्चा
गरे।
भक्तपुरका सम्पदालाई अन्तर्राष्ट्रिय स्तरमा प्रवर्द्धन गर्न र स्थानीय उद्योगलाई पर्यटनसँग जोड्ने उद्देश्यले निकट भविष्यमा ‘सन्ध्याकालीन सम्पदा यात्रा (Evening Heritage Walk)’ आयोजना गर्ने तयारी गरिएको छ। यस सहकार्यले भक्तपुरको पर्यटन क्षेत्रमा नयाँ आयाम थप्ने र रैथाने पहिचानलाई अझ सशक्त बनाउने अपेक्षा गरिएको छ।
Published Date: 02 May 2026
