भक्तपुर, वैशाख १५ । शिक्षा केवल अक्षर चिनाउने प्रक्रिया होइन, यो भविष्य निर्माण गर्ने बलियो आधार हो। यही दृष्टिकोणलाई आत्मसात गर्दै “विशिष्टताको लागि शिक्षा” भन्ने मूल नारासहित स्थापना भएको मनोरम बोर्डिङ्ग सेकेण्डरी स्कुल आज २२ वर्षे गौरवशाली यात्रामा उभिएको छ—जहाँ हरेक विद्यार्थीको सपना, संघर्ष र सफलताको कथा गाँसिएको छ।
वि.सं. २०६० साल पुस १७ गते ( 1st January, 2004 AD ) सामान्य सुरुवातका साथ स्थापना भएको यस विद्यालयमा प्रारम्भमा जम्मा ४२ जना विद्यार्थी थिए। सीमित स्रोत र साधन हुँदाहुँदै पनि ठूलो दृष्टिकोणका साथ रोपिएको त्यो सानो बीउ आज विशाल वृक्षमा परिणत भएको छ, जहाँ करिब ४०० विद्यार्थीहरू आफ्ना सपनालाई आकार दिइरहेका छन्। समयक्रममा विद्यालयले विभिन्न उतारचढाव पार गर्दै कहिले सहज त कहिले चुनौतीपूर्ण परिस्थितिहरूको सामना गर्यो।
विशेषगरी, विश्वव्यापी महामारी कोभिड–१९ ले शिक्षा क्षेत्रमा गम्भीर असर पार्यो। बन्द कक्षाकोठा, सुनसान प्राङ्गण र अनिश्चित भविष्यबीच पनि मनोरम स्कुल अडिग रह्यो। अनलाइन कक्षामार्फत शिक्षाको निरन्तरता कायम राख्दै विद्यालयले चुनौतीलाई अवसरमा रूपान्तरण गर्यो। यही लचकता र नवप्रवर्तनशीलताले विद्यालयलाई आजको उन्नत अवस्थासम्म पुर्याएको हो।
उत्कृष्टताको पहिचान:
लामो समयदेखि शैक्षिक क्षेत्रमा समर्पित अनुभवी शिक्षक/शिक्षिकाहरूको सामूहिक प्रयास तथा समाजका विभिन्न क्षेत्रमा प्रतिष्ठा कमाएका व्यक्तिहरूको सल्लाह र सुझावमा मनोरम स्कूल स्थापना भएको हो।
विद्यालयका प्रिन्सिपल श्री महेश गुमान्जुका अनुसार, “उत्कृष्ट नतिजा ल्याउने होस् वा कमजोर नतिजा ल्याउने—सबै विद्यार्थी हाम्रा आफ्नै हुन्। कसैप्रति पनि भेदभाव नगरी सबैलाई आफ्नो क्षमता प्रस्तुत गर्ने अवसर दिनुपर्छ।”
कठिन परिस्थितिबीच पनि विद्यालयले गुणस्तरीय शिक्षामा कुनै सम्झौता गरेन। यसको स्पष्ट प्रमाण एस.ई.ई. परीक्षा २०८० मा प्राप्त उत्कृष्ट नतिजा हो।
एस.ई.ई. परीक्षा २०८० मा यस मनोरम स्कुलकी छात्रा प्रनिशा बखुन्छे ले ४.० GPA हासिल गर्दै विद्यालयको नाम उज्यालो बनाइन् भने आधारभुत तह कक्षा ८ (बि .ई.ई. परीक्षा – २०८१) को नगरस्तरीय परीक्षामा प्रबृति भुजुले पनि सोही ४.० GPA उपलब्धि हासिल गरिन्।
सीमित स्रोत र साधनका बाबजुद यी उपलब्धिहरू हासिल हुनु विद्यालयका लागि अत्यन्त गर्वको विषय बनेको छ। यस सन्दर्भमा प्रिन्सिपल गुमान्जु भावुक हुँदै भन्नुहुन्छ कि यस्तो सफलता “नाङ्गो खुट्टाले सगरमाथा चढ्नु सरह” अनुभूति भएको छ। उहाँले यस उपलब्धिको श्रेय सम्पूर्ण विद्यालय परिवार, अभिभावक तथा शुभेच्छुकहरूको सामूहिक प्रयासलाई दिनुहुन्छ।
यी उपलब्धिहरू केवल अंक मात्र होइनन्, मेहनत, अनुशासन र सही मार्गदर्शनको प्रतिफल हुन्।
सिकाइको समग्र वातावरण:
विद्यालयले शिक्षालाई केवल पाठ्यपुस्तकमा सीमित नराखी बहुआयामिक सिकाइको वातावरण निर्माण गरेको छ।
यहाँ १६ जना पूर्णकालीन र ९ जना अंशकालीन शिक्षकहरूका साथै १० जना अनुभवी कर्मचारीहरू कार्यरत छन्। साथै उसु, नृत्य, संगीत र स्काउटजस्ता अतिरिक्त गतिविधिका प्रशिक्षकहरूले विद्यार्थीहरूको सर्वाङ्गीण विकासमा महत्वपूर्ण भूमिका खेलिरहेका छन्।
पुस्तकालयको शान्त वातावरणदेखि विज्ञान प्रयोगशालाको प्रयोगात्मक अभ्यास, कम्प्युटर कक्षको प्रविधिमैत्री सिकाइदेखि सेमिनार हलका अन्तरक्रियात्मक कार्यक्रमसम्म—प्रत्येक संरचना सिकाइलाई जीवन्त बनाउने उद्देश्यले विकास गरिएको छ।
प्रविधिसँगै अगाडि:
समयको मागअनुसार विद्यालयले प्रविधिलाई प्रभावकारी रूपमा अंगालेको छ। Veda App तथा eSewa आधारित Manoram App मार्फत शुल्क भुक्तानी, परीक्षा नतिजा, सूचना आदानप्रदान तथा प्रशासनिक कार्यहरूलाई सहज बनाइएको छ।
CCTV जडान, डिजिटल बिलिङ प्रणाली तथा आधुनिक कक्षा व्यवस्थापनले विद्यालयलाई अझ व्यवस्थित, सुरक्षित र पारदर्शी बनाएको छ—जहाँ अभिभावकहरू विश्वस्त हुन सक्छन्।
किताबभन्दा बाहिरको शिक्षा:
मनोरम स्कुलमा शिक्षा केवल कक्षाभित्र सीमित छैन। यहाँ विद्यार्थीहरूलाई जीवनोपयोगी सीपहरू सिकाइन्छ।
नृत्य, उसु, चित्रकला, विज्ञान प्रदर्शनी, स्काउट, रोबोटिक्स, खेलकुद तथा विभिन्न सचेतनामूलक कार्यक्रमहरूले विद्यार्थीहरूको प्रतिभा प्रस्फुटनमा महत्वपूर्ण योगदान पुर्याइरहेका छन्।
विद्यार्थीहरूले जिल्ला तथा नगरस्तरीय प्रतियोगिताहरूमा उत्कृष्ट प्रदर्शन गर्दै विभिन्न पुरस्कारहरू हासिल गरेका छन्। PABSON Science Exhibition देखि अन्तर्राष्ट्रिय चित्रकला प्रतियोगितासम्मको सहभागिताले विद्यालयको क्षमताको दायरा अझ फराकिलो बनाएको छ।
भोलिको तयारी:
अतीतको अनुभव र वर्तमान उपलब्धिलाई आधार मानेर विद्यालय भविष्यतर्फ दृढतापूर्वक अघि बढिरहेको छ।
पूर्वाधार विस्तार, शिक्षण विधिको आधुनिकीकरण, कक्षा १२ सम्म सञ्चालनको योजना तथा खेलकुद र अतिरिक्त क्रियाकलापमा थप जोड—यी सबै प्रयासहरू विद्यालयलाई अझ सशक्त बनाउने दिशामा केन्द्रित छन्।
विद्यालयले अभिभावक, शिक्षक र समुदायबीचको सहकार्यलाई अझ मजबुत बनाउँदै समयसापेक्ष शिक्षा प्रणाली विकास गर्ने लक्ष्य लिएको छ।
मनोरम बोर्डिङ्ग सेकेण्डरी स्कुल केवल एउटा शिक्षण संस्था होइन—यो एउटा प्रेरणादायी यात्रा हो; संघर्षदेखि सफलता सम्मको, प्रयासदेखि उपलब्धि सम्मको।
यहाँ हरेक बिहान नयाँ आशा जन्मिन्छ, र हरेक साँझ एउटा उपलब्धिको कथा लेखिन्छ।
