चोछेंमा आज साँझ छुमा गणेश जात्रा सुरु हुँदै

भक्तपुर, वैशाख ४ । भक्तपुर नगरपालिका वडा नं. ६ स्थित चोछेंमा आज साँझ छुमा गणेश जात्रा सुरु हुने भएको छ।

धार्मिक तथा ऐतिहासिक महत्व बोकेको छुमा गणेश मन्दिरसँग सम्बन्धित किंवदन्ती अनुसार ‘छु’ (मुसा) र ‘मा’ (लाइन) शब्दबाट ‘छुमा’ नाम रहन गएको मानिन्छ। कथा अनुसार मुसाहरूको ठूलो समूहले पूजा गर्ने स्थानका रूपमा यो क्षेत्र परिचित बनेको हो।

अर्को कथाअनुसार, एक राजाले बिरालो र मुसाबीचको लडाइँमा मुसाले जितेको देखेपछि त्यसलाई पछ्याउँदै जाँदा यहाँको गणेशको दर्शन गरेका थिए। त्यसपछि उनले दक्षिणतर्फ रहेको भद्रकालीको पूजा गरी यी दुई स्थानको बीचमा नगर स्थापना गरेका थिए, जसलाई आजको भक्तपुर नगरको सुरुवात मानिन्छ।

प्यागोडा शैलीमा निर्माण गरिएको छुमा गणेश मन्दिरको संरचना पनि विशेष प्रकारको रहेको छ, जसको बहु-स्तरीय झ्यालझैं देखिने बनावट आकर्षक मानिन्छ।