काठमाडौँ, चैत २४ । सोमबार उच्च अंकले बढेको सेयरबजार मंगलबार भने टिक्न सकेन । आज नेप्से २.६१ अंकले घटेर २ हजार ७५७.४० विन्दुमा कायम रहेको छ । आज सेयरबजारमा ३४५ कम्पनीका सेयर कारोबार भएका छन् । यी मध्ये ८२ कम्पनीका सेयरमूल्य बढेका छन् भने १७५ कम्पनीका सेयरमूल्यमा गिरावट आएको छ ।
आज सेयरबजारमा १ करोड ७४ लाख ६ हजार ६१६ कित्ता सेयर ६ अर्ब ७३ करोड ७१ लाख ४८ हजार रुपैयाँमा किनबेच भएको छ । कारोबार रकम सोमबारको तुलनामा ३८ प्रतिशतले कमी हो । आज सेयरबजारमा सूचीकृत समूहका समूहगत परिसूचकमध्ये वाणिज्य बैंक, होटेल तथा पर्यटन, जलविद्युत तथा अनय समूहका परिसूचक सकारात्मक रहेका छन् ।
विकास बैंक, वित्त, लगानी, जीवन बीमा, उत्पादनशील तथा प्रशोधन, लघुवित्त, म्युचुअल फण्ड, निर्जीवन बीमा तथा व्यापार समूहका परिसूचक भने ओरालो लागेका छन् ।
भुजुङ हाइड्रोेपावर लिमिटेड, सुपर खूदी हाइड्रोपावर लिमिटेड तथा स्वेत गंगा हाइड्रोपावर एण्ड कन्स्ट्रक्सन लिमिटेडका सेयरधनीले सबैभन्दा बढी कमाएका छन् । सबैभन्दा बढी गुमाउनेमा भने एनआईवीएल ग्रोथ फण्ड, झापा इनर्जी लिमिटेड तथा चिरख्वा हाइड्रोपावर लिमिटेडका सेयरधनी रहेका छन् ।
