काठमाडौं, चैत २३ । इन्धनको खपत घटाउने उद्देश्यले नेपाल सरकारले दुई दिन सार्वजनिक बिदा दिएको सन्दर्भमा नेपाल आयल निगमले सर्वसाधारणलाई अनावश्यक रूपमा घुमफिर नगर्न अनुरोध गरेको छ।
निगमले एक सूचना जारी गर्दै बिदाको समयमा सवारी साधनको अत्यधिक प्रयोग हुँदा इन्धन खपत बढ्ने भएकाले आवश्यक बाहेकका यात्रा नगर्न आग्रह गरेको हो। इन्धन आपूर्ति व्यवस्थापनमा सहजता ल्याउन तथा देशभर आपूर्ति सन्तुलन कायम राख्न नागरिकको सहयोग आवश्यक रहेको निगमको भनाइ छ।
निगमका अनुसार हालको परिस्थितिमा इन्धनको विवेकपूर्ण प्रयोग अत्यन्त जरुरी भएकाले अनावश्यक यात्रा, लामो दूरीको भ्रमण तथा सवारी साधनको अत्यधिक प्रयोगबाट टाढा रहन सबैमा अपिल गरिएको छ।
सरकारको यो निर्णयलाई प्रभावकारी बनाउन नागरिकको सचेतना र सहयोग महत्वपूर्ण हुने भन्दै निगमले अत्यावश्यक काम बाहेक सवारी साधन नचलाउन आग्रह गरेको छ।
