काठमाडौं, चैत ८ । मन्टेसरी एजुकेशन स्कुल सूर्यविनायक, भक्तपुरको आयोजना तथा ख्वप तिलगंगा आँखा अस्पतालको प्राविधिक सहयोगमा निःशुल्क आँखा परीक्षण शिविर सम्पन्न भएको छ।
स्कुलको प्रांगणमा बिहान ९ बजेदेखि दिउँसो १ बजेसम्म सञ्चालन गरिएको उक्त शिविरमा जम्मा २६५ जना विद्यार्थी, अभिभावक तथा स्थानीय समुदायका व्यक्तिहरूले सेवा लिएका थिए।
शिविरका क्रममा २ जना मोतीबिन्दुका बिरामी पहिचान भएका छन् भने ४७ जनालाई चस्मा लगाउन तथा प्रयोग गर्न सिफारिस गरिएको आयोजकले जनाएको छ। सहभागीहरूले निःशुल्क आँखाको परीक्षण सेवा पाउनुका साथै आवश्यक परामर्श पनि प्राप्त गरेका थिए।
कार्यक्रमले स्थानीय स्तरमा आँखा स्वास्थ्यप्रति सचेतना अभिवृद्धि गर्न महत्वपूर्ण योगदान पुर्याएको विद्यालय प्रशासनको भनाइ छ।
शिविर समापनपछि ख्वप तिलगंगा आँखा अस्पताललाई धन्यवाद स्वरूप मायाको चिनो विद्यालय व्यवस्थापन समितिका अध्यक्ष अच्युत प्रजापतीद्वारा प्रदान गरिएको थियो।
यस किसिमका स्वास्थ्य शिविरहरूले समुदायमा स्वास्थ्य सेवा पहुँच विस्तार गर्न सहयोग पुग्ने अपेक्षा गरिएको छ।
