काठमाडौं, फागुन ९ । नेपाल राष्ट्र बैंकका कार्यकारी निर्देशक रेवतीप्रसाद नेपालले एकै व्यक्तिले धेरै लघुवित्त संस्थाबाट ऋण लिन नपाउने व्यवस्था राष्ट्र बैंकले ल्याउन लागेको बताएका छन् ।
सोमबार काठमाडौंमा आयोजित एक कार्यक्रममा बोल्दै उनले लघुवित्त, संकटको कारण र समाधान विषयक अन्तरक्रिया कार्यक्रममा नेपालले ३३ लाखभन्दा बढी लघुवित्त ऋणी रहेकाले प्रत्येकको फाइल हेर्न नसकेको बताए ।
उनले पछिल्लो समय धेरै लघुवित्त संस्थाको सदस्य भएकाले सबैबाट ऋण लिएर एक व्यक्ति समस्यामा परेको र अहिले निर्देशिका मार्फत कडाई गर्ने तयारी भइरहेको बताए । नेपालले लघुवित्त संस्थालाई लाभांश वितरणमा कडाइ गरे मात्रै धेरै समस्या समाधान हुने बताए । वित्तीय साक्षरता नहुँदा ऋणीले लिएको ऋण सदुपयोग गर्न नसकेको उनले बताए ।
त्यस्तै पछिल्लो समय लघुवित्तमा देखिएका समस्या समाधान गर्न आवश्यक रहेको उनले बताए । लघुवित्तका कर्मचारीले स्थानीय तहमा आचरणमा सुधार ल्याउन आवश्यक रहेको भन्दै कर्जा सार्कका कारण स्थानीय तहमा समस्या बढ्दै गएको उनले बताए ।
त्यसैगरी नेपालले लघुवित्त संस्थाका कर्मचारीलाई बिहान १० बजेदेखि बेलुका ११ बजेसम्म ग्राहकको घरमा नआउन र तत्काल घरमा ताला लगाएर गाईवस्तु लिएर यातना दिन आग्रह गरेको छ ।
नेपालले कुनै पनि लघुवित्त संस्थाले १५ प्रतिशतभन्दा बढी ब्याज लिएमा राष्ट्र बैंकमा उजुरी गर्न सबैलाई आग्रह गरेको छ । पछिल्लो समय ५ देखि १० प्रतिशत लघुवित्त संस्थाले नराम्रो काम गरेकाले आफू सच्याउनुपर्ने वा कारबाही गर्नुपर्ने उनको भनाइ छ ।
नेपालले पछिल्लो समय केही सेयरधनीले लघुवित्तमा घुसेर लघुवित्तमा भ्रष्टाचार गरेको आरोप समेत लगाएको छ । उनले कोरोना महामारी र तरलता अभावका कारण लघुवित्तमा पनि समस्या भएको दाबी गरे ।
यसैबीच लघुवित्त संघ नेपालका अध्यक्ष जगत पोखरेलले धेरै लघुवित्त भएकाले समस्या भएको बताए । राष्ट्र बैंकले दिएको निर्देशनमा लघुवित्त संस्थाले काम गर्नुपर्ने र पालना नगरे कारबाही गर्नुपर्ने उनले बताए ।
पोखरेलले पनि लघुवित्तले ग्रामीण क्षेत्रमा उत्पादन बढाउन र बजार व्यवस्थापन गर्न कसरी लगानी गर्ने भन्नेमा जोड दिएको बताए ।
