भक्तपुरको व्यासीमा गोली र लागूऔषधसहित सुमित त्यात पक्राउ, थप अनुसन्धान जारी

भक्तपुर, जेठ १० । भक्तपुर प्रहरीले एक राउण्ड गोली र लागूऔषधसहित एक युवकलाई नियन्त्रणमा लिएको छ।

जिल्ला प्रहरी परिसर भक्तपुरका अनुसार २०८३ जेठ १० गते दिउँसो करिब १ः१५ बजे विशेष सूचनाको आधारमा भक्तपुर नगरपालिका–२ व्यासी क्षेत्रमा प्रहरी टोली परिचालन गरिएको थियो। जिल्ला प्रहरी परिसर भक्तपुरबाट खटिएको टोलीले उक्त स्थानमा बस्दै आएका २० वर्षीय सुमित त्यातलाई नियन्त्रणमा लिएको जनाएको छ।

प्रहरीले उनको साथबाट ३०३ राइफलमा प्रयोग हुने एक राउण्ड गोली तथा लागूऔषध ट्रामाडोल १० चक्की बरामद गरेको जनाएको छ। पक्राउ परेका युवकलाई नियन्त्रणमा लिएर घटनाबारे थप अनुसन्धान भइरहेको जिल्ला प्रहरी परिसर भक्तपुरले जानकारी दिएको छ।