चलचित्र ‘आ बाट आमा’ को ट्रेलर सार्वजनिक, माघ १६ गतेदेखि प्रदर्शन हुँदै

काठमाडौं, माघ ८ । यहि माघ १६ गतेदेखि प्रदर्शनमा आउन लागेको नेपाली चलचित्र ‘आ बाट आमा’ को ट्रेलर सार्वजनिक समारोहमा फिल्ममा आवद्ध कलाकारहरुले फिल्ममा आफ्नो भूमिका बारेमा जानकारी गराएका छन् ।

फिल्ममा अभिनेता पल शाहकी आमाको भूमिकामा प्रस्तुत भएकी अभिनेत्री विपना थापाले यो फिल्मबाट अझ धेरै कुरा सिक्ने मौका पाएको बताएकी छिन् । ‘आ बाट आमा माघ १६ गतेदेखि प्रदर्शन हुँदैछ । हेरेर प्रतिक्रिया दिनुहोस् । कस्तो चलचित्र बनेको छ म भन्दिन आज । यो जिम्मेवारी मेरो दर्शकको हो । यो चलचित्रबाट मैले अझ धेरै कुरा सिक्ने मौका पाएकी छु,’ अभिनेत्री थापाको भनाइ छ ।

कार्यक्रममा बोल्दै अभिनेता पल शाहले यो फिल्म दर्शकहरुलाई मन पर्नेमा आफू विश्वस्त रहेको बताए । उनले यो फिल्ममा राम्रो भूमिका दिएकोमा निर्माण टिमलाई समेत धन्यवाद दिएका छन् । ‘ट्रेलरबाट म अहिले पनि बाहिर निस्कन सकेको छैन । एकदमै भावुक भइरहेको छु । दर्शकहरुलाई पनि मन पर्छ भन्ने विश्वास छ त्यही भन्न चाहन्छु । कस्तो लाग्छ, प्रतिक्रिया दिनुहोला । यति राम्रो भूमिकाको लागि मलाई विश्वास गर्नुभएकोमा धन्यवाद दिन चाहन्छु,’ अभिनेता शाहले भनेका छन् ।

फिल्मका कलाकार साइग्रेस पोखरेलले पहिलोपटक यो फिल्ममार्फत अभिनयमा उत्रिन पाउनु नै भाग्यको कुरा भएको बताएका छन् । उनले घर नभएको आमा होस् तर आमा नभएको घर नहोस् भन्ने भनाई नै यो फिल्ममा देखाउन खोजेको भन्दै आमा शब्द धेरै नै भारी भएको बताए । उनले भने– ‘एउटा भनाई छ, बरु घर नभएको आमा होस् तर आमा नभएको घर नहोस् भन्ने । त्यसैले आमा शब्द कति भारी छ । म पहिलोपटक यस चलचित्रमा अभिनयमा उत्रिन पाउनु भाग्यको कुरा हो । आमा, भगवान श्रीकृष्ण र भगवान श्रीराम यो तीन वटा कुराले यो अभिनयमा मैले आफूलाई स्वीकार गरेँ ।’

चन्द्र पन्त निर्देशित फिल्म ‘आ बाट आमा’ मा विपना थापा, पल शाह, प्रदीप रावत, उषा उप्रेती, सिम्रन पन्त, साइग्रेस पोखरेल, गजित विष्ट, बेगम नेपाली लगायतको मुख्य भूमिका रहेको छ ।