भक्तपुर, पुस १७ । सूर्यविनायक चोकदेखि धुलिखेलसम्म अरनिको राजमार्ग फराकिलो बनाउने काम तीव्र गतिमा अघि बढिरहेको छ । यसै क्रममा राजमार्गमा पर्ने विभिन्न चोकहरू पुनःसंरचना तथा हटाउने सरकारी तयारीप्रति स्थानीय बासिन्दाहरूले आपत्ति जनाएका छन् ।
सूर्यविनायक चोक नजिकै अवस्थित भुलाँचा चोक हटाउने सम्भावित निर्णयविरुद्ध स्थानीयवासी आन्दोलित बनेका हुन् । भुलाँचा चोकबाट लुठाबु, भक्तपुर नगर क्षेत्र तथा आसपासका बस्तीहरूमा आवत–जावत गर्न सहज हुँदै आएको स्थानीयको भनाइ छ । उक्त चोक हटाइएमा पैदलयात्री, विद्यार्थी, वृद्धवृद्धा तथा दैनिक यात्रुहरूलाई ठूलो असुविधा हुने उनीहरूको गुनासो छ ।
राजमार्ग विस्तारको नाममा स्थानीय आवश्यकतालाई बेवास्ता गर्न नहुने भन्दै स्थानीयवासीहरूले चोक यथावत् राख्न माग गरेका छन् । सो मागलाई सार्वजनिक गर्न उनीहरूले चोक आसपास चेतावनीमूलक पोस्टर टाँस्नुका साथै विरोध प्रदर्शनसमेत सुरु गरेका छन् ।
स्थानीयको भनाइमा भुलाँचा चोक केवल सडक पार गर्ने स्थान मात्र नभई सामाजिक, सांस्कृतिक र दैनिक जीवनसँग जोडिएको महत्वपूर्ण केन्द्र हो । “हाम्रो सुरक्षाको सुनिश्चितता नगरी चोक हटाउनु जनविरोधी निर्णय हुनेछ,” एक स्थानीयले बताए ।
यस विषयमा सम्बन्धित निकायको ध्यानाकर्षण गराउँदै स्थानीयहरूले सुरक्षित क्रसिङ, ट्राफिक व्यवस्थापन र स्थानीयको आवश्यकतालाई मध्यनजर गरी निर्णय लिन माग गरेका छन् । समयमै समस्या समाधान नभए आन्दोलनलाई थप सशक्त बनाउने चेतावनीसमेत दिइएको छ ।
Published Date: 01 January 2026
