काठमाडौं, फागुन ८ । नेकपा (माओवादी केन्द्र)ले नयाँ राष्ट्रपतिको विषयमा औपचारिक निर्णय गर्न आज औपचारिक बैठक बोलाएको छ । बैठक दिउँसो ४ बजे पार्टी कार्यालय परिसरमा बस्नेछ ।
आइतबार साँझ प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डले नेपाली काँग्रेसका सभापति शेरबहादुर देउवासहित पाँच शीर्ष नेतासँग बालुवाटारमा छलफल गरेका थिए ।
आगामी चैतमा हुने राष्ट्रपति निर्वाचनमा पार्टीले कसलाई साथ दिने भन्नेबारे आजको बैठकले औपचारिक निर्णय गर्ने बताइएको छ । एमालेले अध्यक्षको दाबी गर्दै आएको छ । एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डबीच भएको सहमति अनुसार एमालेले राष्ट्रपतिमा दाबी गरेको छ ।
तर राष्ट्रिय सहमतिका लागि पहल गरिरहेका प्रधानमन्त्री दाहाल भने नेपाली काँग्रेसबाटै राष्ट्रपति बनाउने मुडमा छन् । उनलाई विश्वासको मतमा समर्थन गरेको नेपाली कांग्रेसले पनि अध्यक्षमा दाबी गरिरहेको छ ।
यसै सन्दर्भमा आइतबार साँझ नेपाली कांग्रेसका शीर्ष नेताहरुले प्रधानमन्त्री दाहालसँग भेट गरेका छन् । नेपाली कांग्रेसले सहयोगको लागि सोध्दा प्रधानमन्त्रीले पार्टीभित्र छलफल गरेर निर्णय गरिने जवाफ दिएका थिए ।
Published Date: 20 February 2023
