काठमाडौँ, कार्तिक ९ । खाद्य तथा व्यापार कम्पनी लिमिटेडले सरकारले तोकेको न्यूनतम समर्थन मूल्यमा धान खरिद गर्ने भएको छ ।
सरकारले मोटा धानको ३ हजार ४६३ रुपैयाँ प्रतिक्विन्टल र मध्यम धानको ३ हजार ६२८ रुपैयाँ प्रतिक्विन्टल न्यूनतम समर्थन मूल्य तोकेको छ ।
सोही मूल्यमा किसानको १ लाख ९० हजार क्विन्टल धान खरिद गरिने खाद्य व्यवस्था तथा व्यापार कम्पनी लिमिटेडले जनाएको छ ।
धान उत्पादनको पकेट क्षेत्रलाई आधार मानेर धान खरिद गर्ने तयारी गरिएको छ । यसअनुसार देशभर १३ वटा खरिद केन्द्र सञ्चालन गरी धान खरिद गरिने कम्पनीले जनाएको छ ।
कम्पनीकाअनुसार महेन्द्रनगर, धनगढी, राजापुर, नेपालगञ्ज, जुम्ला, तुलसीपुर, भैरहवा, पोखरा, वीरगञ्ज, लहान, जनकपुर, विराटनगर र बिर्तामोडमा खरिद केन्द्र सञ्चालन गरिने छ ।
Nabil bank
साथै धान खरिदको भुक्तानी सोझै किसानको खातामा पठाउने जनाएको छ । यसअघि चेकमार्फत भुक्तानी हुने गरेको थियो ।
किसानले उक्त चेक साट्न बैंक धाउनुपर्ने बाध्यता भने हटेको छ । कम्पनीका प्रमुख कार्यकारी अधिकृत रमेश आचार्यका अनुसार यो वर्ष १ लाख ९० हजार क्विन्टल धान खरिद गर्ने लक्ष्य लिइएको छ ।
आचार्यले भने ‘पोहोर साल धान लक्ष्यअनुसार खरिद गर्न सकेनौँ । यो वर्ष थोरै लक्ष्य राखेका छौँ । लक्ष्य पुरा भएपछि बजारमा धान पर्याप्त पाइएमा कोटा थप गर्छौँ ।’
अघिल्लो वर्ष खाद्यले १ लाख २० हजार क्विन्टल धान खरिद गरेको थियो ।
Published Date: 26 October 2025
