काठमाडौं, साउन ११ । नेपालको लोकप्रिय सांगीतिक समुह (ब्याण्ड) मंगोलियन हार्टले पहिलो पटक न्यूजिल्याण्ड सांगीतिक टूर गर्ने भएको छ ।
सन् १९९२ मा स्थापना भएको यो ब्याण्डले सन् २०२५ को विशेष टूर अन्तर्गत न्यूजिल्याण्डका तीन प्रमुख शहरहरू– क्राइस्टचर्च, अकल्यान्ड तथा टाउरङ्गामा आफ्ना दर्शक–श्रोतामाझ प्रत्यक्ष सांगीतिक प्रस्तुति दिने भएको हो ।
न्यूजिल्यान्डमा पहिलो पटक म्युजिकल टूर गर्न पाउँदा उत्साहित छ यो ब्याण्ड । टुरलाई भव्य बनाउन गज्जब तयारी गरिरहेको बताउँछन्, ब्यान्डका म्यानेजर तथा गितारिस्ट बोबी लामा । ‘हामी नयाँ तथा पुराना दुवै गीतहरू प्रस्तुत गरेर दर्शकलाई पूर्ण मनोरञ्जन दिने तयारीमा छौं । दर्शकको मायाले नै आज हामीलाई अन्तर्राष्ट्रिय मञ्चसम्म ल्याएको हो,’ लामाले भनेका छनु ।
मंगोलियन हार्टको आठ सदस्यीय टोली यही जुलाई २९ अर्थात साउन १३ गते मंगलवारका दिन काठमाडौंबाट न्यूजिल्याण्डका लागि प्रस्थान गर्नेछ । यो टूरको आयोजना स्थानीय इभेन्ट कम्पनी सम्बन्ध इभेन्ट्सद्वारा गरिएको हो ।
सांगीतिक यात्राका क्रममा ब्याण्डले आफ्ना सुपरहिट गीतहरूको प्रस्तुति दिनेछ भने नेपाली समुदायलाई एकै ठाउँमा ल्याई सांस्कृतिक उत्सवको रूप दिने लक्ष्य लिइएको छ । नेपाली संगीतप्रेमीहरूका लागि यो टूर एक अविस्मरणीय अवसर बन्ने आयोजकको विश्वास छ । ब्याण्डको टोली आगामी अगस्ट १५ मा नेपाल फर्किने छ र त्यसपछि अगस्ट २० मा मिजोरम, उत्तर–पूर्व भारतमा आफ्नो प्रस्तुति दिन जाँदैछ ।
गायक राजु लामा लिड भोकलिस्ट रहेको यो ब्यान्डमा बोबी लामा रिदम गिटार, भूपेन्द्र बज्राचार्य लिड गिटार, सन्तोष थापा ड्रम, विनय महर्जन बाँसुरी, बाबुराजा महर्जन परकसन ९मादल०, पवन कपाली बास गिटार र निरेन्द्र रञ्जित साउन्ड इन्जिनियर रहेका छन् ।
बाँदलपारिको देशबाट, मेरो नेपाल, सुम्निमा, म माया लाउँदिनँ, हल्ला चलेछ, तिमीलाई देखेर, पर्खाइमा, सायद तिम्रो बाटोमा, उँभो उँभो खासा, सैलुङ्गे मेला आदि मंगोलियन हार्टका लोकप्रिय गीतहरू हुन् ।
Published Date: 27 July 2025
