काठमाडौँ, फागुन ४ । ग्याँस सिलिन्डर विस्फोट भई घाइते भएका गुल्मी क्षेत्र नं. १ बाट निर्वाचित सांसद डा. चन्द्रकान्त भण्डारी र उनका आमा हरिकला भण्डारीलाई थप उपचारका लागि भारतकाे मुम्वाइ लगिने भएको छ । एयर कार्गोबाट उनलाई तत्काल दिल्ली लाने प्रक्रिया सुरु गरिएको डा. भण्डारीका सहयोगी भुवन भुसालले जानकारी दिए।
बुधवार राती करिब १० बजेतिर ग्याँस सिलिन्डर विस्फोट हुँदा घाइते भएका नेता र उनका आमाको कीर्तिपुरस्थित बर्न अस्पतालमा उपचार गरिएको थियो । दुवै जना खतरामुक्त रहेको बर्न अस्पतालका चिकित्सक डा. किरण नकर्मीले जानकारी दिए ।
डा. नकर्मीका अनुसार डा. भण्डारीको शरीरको करिब ३० प्रतिशत र उनका माताको ७० प्रतिशत शरीरको भाग जलेको छ । डाक्टर नकर्मीका अनुसार डा. भण्डारीको फोक्सोमा धुवा पसेको छ ।
अस्पतालमै भएका डा. भण्डारीका सहयोगी भुवन भुसालका अनुसार, सांसद भण्डारीको मुख, घाँटी र खुट्टामा जलेको छ । यसै गरी, उनका ८८ वर्षीय आमा हरिकला भण्डारीको अवस्था भने गम्भीर छ ।
