भक्तपुर, असार १५ । आइकन मिडिया हाउस प्रा. लि र आइकन खबर डटकमद्वारा आयोजित “रोपाईं जात्रा तथा दही चिउरा कार्यक्रम २०८२” कार्यक्रम सम्पन्न भएको छ । यस वर्षको रोपाई जात्रालाई अझ रमाइलो र सांगीतिक बनाउन भक्तपुरका आरम्भ वाद्यशालाका युवा वाद्यवादकहरुले विशेष प्रस्तुति दिएका थिए ।
नेवा समुदायमा प्रचलित परम्परागत बाँसुरी बाजाको माध्यमबाट उनीहरुले रोपाईको उल्लास थप्दै सांस्कृतिक विविधतालाई उजागर गरेका थिए। कार्यक्रममा “असारे भाका – असारया सिन्हाज्या” लगायत नेपाली लोकगीत “असारे महिनामा” र “साउने खोलाका धूनहरु” समेत प्रस्तुत गरेका थिए ।
स्थानिय बासिन्दा, बालबालिका, युवा तथा वृद्ध सबैलाई तान्ने गरी प्रस्तुत गरिएको यो सांगीतिक कार्यक्रमले रोपाई पर्वको उत्साहमा थप रङ भरेको थियो।
आरम्भ वाद्यशालाका सदस्यहरुले संस्कृति संरक्षण र नव पुस्तालाई परम्परागत बाजासँग जोड्ने उद्देश्यले यस्ता कार्यक्रम गर्दै आइरहेका छन्।
