काठमाडौं, चैत ११ । युइएफए नेसन्स लिगमा इटलीलाई पराजित गर्दै जर्मनी पहिलो पटक सेमिफाइनलमा पुगेको छ ।
क्वाटरफाइनलको दोस्रो लेगमा आइतवार जर्मनी र इटलीले ३–३ को बराबरी खेले । पहिलो लेगमा २-१ को जितले जर्मनी समग्रमा ५-४ को अग्रतासहित अन्तिम चारमा पुगेको हो।
चौथो संस्करणमा आइपुग्दा जर्मनी पहिलो पटक सेमिफाइनलमा पुगेको हो ।
पाहुना टोलीका लागि मोइसे कीनले २ तथा ज्याकोमो रास्पाडोरीले १ गोल गरे । घरेलु टोली जर्मनीका लागि भने जोसुवा किमिच, जमाल मुसियाला र टिम क्लाइन्डिन्स्टले समान १ गोल गरे ।
जोसुवा किमिचको उत्कृष्ट प्रदर्शनले पहिलो हाफमै जर्मनीलाई खेलमा ३–० को सहज अग्रता बनायो । उनले पेनाल्टीमार्फत १ गोल गरे भने जमाल मुसियाला र टिम क्लाइन्डिन्स्ट गोलमा असिस्ट गरे।
किमिचले ३०औं, मुसियालाले ३६औं र क्लाइन्डिन्स्टले ४५औं मिनेटमा गोल गरे । इटालीले दोस्रो हाफमा पुनरागमन गर्दै मोइसे कीनको दुई गोलमार्फत घरेलु टोलीलाई दबाबमा राख्यो । कीनले खेलको ४९औं र ६९औं मिनेटमा गोल गरे ।
दोस्रो हाफको इन्ज्युरी समयमा रास्पाडोरीले पेनाल्टीमार्फत गोल गरेपछि इटालीको आशा जगेको थियो । फाइनल प्रवेशका लागि जर्मनीले पोर्चुगलसँग प्रतिस्पर्धा गर्नेछन् ।– एजेन्सी
