काठमाडौं, फागुन ६ । क्यानडाको टोरन्टो पियर्सन अन्तर्राष्ट्रिय विमानस्थलमा ८० जना सवार एउटा विमान दुर्घटनामा परेको छ। विमान अवतरण गर्ने समयमा पल्टिएको हो । अमेरिकी संघीय उड्डयन प्रशासनका अनुसार डेल्टा एयर लाइन्सको उडान ४८१९ स्थानीय समय अनुसार दिउँसो २ः४५ बजे अवतरण गर्ने क्रममा दुर्घटना भएको थियो । विमानमा ८० जना सवार थिए ।
चिकित्सा सहायतामा संलग्न टोलीका अनुसार यस घटनामा १५ जना घाइते भएका छन्, जसमध्ये तीन जना गम्भीर घाइते भएको बताइएको छ । घाइतेहरूमा एक बालक र दुई वयस्क पनि छन् । विमान अमेरिकाको मिनियापोलिसबाट टोरन्टो गएको हो । अवतरणको समयमा विमानको पखेटामा रहेका फ्ल्यापहरूले राम्रोसँग काम नगरेकाले विमान पल्टिएको जनाइएको छ ।
एफएएका अनुसार सबै यात्रुहरूलाई विमानबाट बाहिर निकालिएको थियो । विमान दुर्घटना हुनुको कारण अझै थाहा हुन सकेको छैन । क्यानडाकी यातायात मन्त्रीले यो ‘गम्भीर घटना’ मा नजर राखेको बताइन् । केही समयअघि फ्लाइट रडार २४ ले टोरन्टो पियर्सन विमानस्थलबाट लगभग २६ उडानहरू डाइभर्ट गरिएको कुरा एक्समा लेखेको थियो । डेल्टा एयर लाइन्सका सीईओ डेबोरा फ्लिन्टले कुनै पनि यात्रु गम्भीर घाइते भएको बारेमा आफूलाई थाहा नभएको बताए । जबकि, स्थानीयस्तरमा चिकित्सा सहायतामा संलग्न टोलीले तीन जना गम्भीर घाइते भएको बताएको छ । -एजेन्सी
Published Date: 18 February 2025
