काठमाडौँ, माघ १३ । अहिले नेपालमा पश्चिमी वायुको सामान्य प्रभाव रहेको मौसमविदले जनाएका छन् । यतिबेला (आइतबार बिहान) कोशी, बागमती र कर्णाली प्रदेशका पहाडी भू–भागको मौसम आंशिक बदली छ । तराईका धेरै स्थानमा अहिले हुस्सु र कुहिरो लागिरहेको छ । देशका बाँकी भू–भागमा मौसम मुख्यतया सफा रहेको मौसम पूर्वानुमान महाशाखाले शनिबार बिहान ६ बजे जारी गरेको बुलेटिनमा उल्लेख छ ।
‘बुलेटिनमा भनिएको छ, ‘बिहानको समयमा देशका तराई तथा उपत्यकाका धेरै स्थानमा हुस्सु र कुहिरोको सम्भावना रहेकोले दैनिक जनजीवन, कृषि, स्वास्थ्य, यातायात तथा हवाई उडानमा असर पर्न सक्ने हुनाले आवश्यक सतर्कता अपनाउनु हुन अनुरोध छ ।’ आज बिहान ६ बजेर ५३ मिनेट जाँदा सूर्योदय भएको छ । सूर्यास्त साँझ पाँच बजेर ४० मिनेटमा हुनेछ ।
बढ्यो काठमाडौंको न्यूनतम तापक्रम
काठमाडौंको न्यूनतम तापक्रम शनिबारको तुलनामा आइतबार बढेको छ । जल तथा मौसम पूर्वानुमान महाशाखका अनुसार बिहान ५ः४५ बजे काठमाडौंको न्यूनतम तापक्रम ७.८ डिग्री सेल्सियस मापन भएको छ। शनिबार न्यूनतम तापक्रम ५.४ डिग्री सेल्सियस मापन भएको थियो । आइतबार बिहान काठमाडौंको आकाश बादलले ढाकेका कारण न्यूनतम तापक्रम केही बढेको मौसमविद् प्रतिभा मानन्धरले जानकारी दिइन्।
‘बिहान बादल भएका कारण न्यूनतम तापक्रम घट्न पाएन,’ उनले भनिन् । काठमाडौंमा आज दिनभरि आंशिक बदलीको हुने पनि उनले बताइन् । ‘घाम लाग्ने र बादल लाग्ने भइरहन्छ । वर्षाको सम्भावना भने छैन,’ मौसमविद् मानन्धरले भनिन् । काठमाडौंमा आज अधिकतम तापक्रम २१ देखि २३ डिग्री सेल्सियसकाबीच रहने पूर्वानुमान छ ।
