काठमाडौं, मंसिर १४ । देशका अधिकांश सिनेमा हलहरुमा प्रदर्शन भइरहेको फिल्म ‘ह्रस्व दीर्घ’ लाई दर्शकको माया दिनदिनै बढिरहेको छ ।
फिल्मको अकुपेन्सी अहिले पनि ४० देखि ६० सम्म भएको अभिनेत्री नीता ढंगाना बताउँछिन् । आफ्नो फिल्मलाई नेपालगन्ज र दाङका दर्शकले धेरै मन पराइदिएकोमा नीता निकै खुशी छिन् ।
फिल्म रिलिजको प्रारम्भिक दिनभन्दा अहिले फिल्मले पिक लिइरहेकोमा सन्तुष्ट छिन् नीता । उनी भन्छिन् – ‘अफ डेमा पनि फिल्म हाउसफुलका साथ प्रदर्शन भइरहेको छ । शुक्रवार र शनिवार त फिल्मले झन् धेरै व्यवसाय गर्ने कुरामा म ढुक्क छु ।’
नीता भन्छिन् – ‘आज रातिसम्म फिल्मले आठ करोड रुपैयाँ ग्रस कलेक्शन गर्नेछ । अहिले अन्य फिल्म पनि रिलिज भइसकेको छ तर दर्शकको माया भने घटेको छैन, यसमा म धेरै खुशी छु ।’
फिल्म रिलिजको शुरुवाती दिनमा विभिन्न कठिनाईको सामना गर्नु परेको ह्रस्व दीर्घ टिम अहिले भने आफ्नो मेहनतको फल मिठोसँग चाख्न पाउँदा खुशी छन् ।
